كريم تاج الدين يكتب: " ابقى قابلنى "

من يوم ما اتولدت كل ما تحصل حاجة فى فلسطين... يعنى اقتحام المسجد الأقصى... هدم البيوت وتهجير أهلها... تهويد القدس..... اغتيالات.... اعتقالات... اغتصابات... يعنى الحاجات العادية دى اللى بتحصل كل يوم ألاقى كتير من الناس تروح متحمسة أوى تقلك... " على القدس رايحين شهداء بالملاين "... " خيبر خيبر يا يهود جيش محمد بدأ يعود "... " يا قدس إنا قادمون ".

قادمون إمتى ؟؟..... بلاش دى صعبة شوية.... طب قادمون إزاى ؟؟؟.....
الناس إللى بتتكلم على تحرير الأقصى وتحرير فلسطين... عملتوا إيه عشان ده يتحقق
هل خصصتوا فترة ولو خمس دقايق يوميا من برنامج على إحدى القنوات الفضائية عشان يذكر بالقضية الفلسطينية وتاريخ القضية عشان القضية متموتش... انزل أى جامعة واسأل الشباب يعرفوا إيه عن القضية... هتذهل من النتيجة لأن أغلبهم ميعرفش حاجة.

هل طورتوا المناهج وخصصتوا وحدة من كتاب التاريخ لشرح قصة فلسطين وأن أساسها عربى من أيام الكنعانيين.. مش زى ما اليهود بيزعموا عشان تفضل القضية عايشة جيل بعد جيل.

جمعت تبرعات وعملت مشاريع خيرية دائمة يكون مكسبها سنويا لصالح الفلسطينيين بالكامل عشان إللى إسرائيل تهده نبنيه تانى من عائد المشاريع دى.

عملت ندوات فعاليات مسابقات أى شىء عشان تقرب الشباب العربى من بعضه فى كل الدول العربية وتحمسهم وتزرع حب القضية فى قلوبهم.... لأن شباب النهارده هم الأمل فى تحرير فلسطين بكرة.

بلاش كل ده... حاولتوا تصلحوا نفسكم الأول وتتقوا الله؟

إحنا السبب فى إللى فيه فلسطين... والعراق... وليبيا... وسوريا... وبورما... وكل مكان على الخريطة اتملى ببقع الدم المسلم وأنا أولكم إن الله لا يغير ما بقوم حتى يغيروا ما بأنفسهم، فبالله عليكم ارحمونا بقى وكفاية متاجرة بالقضية.... يا نبقى أدها.... يا إما ندعى أنه يجى حد من نسلنا يعمل إللى مقدرناش نعمله.