محمد عمر يكتب: مستنى ردِك

رُحتلك وبقول بحبك
قلتى سيبنى شوية أفكر
عدت الأيام وردك
طال عليه صبرى وأخّر
**********
جيت أهو ولحد عندك
وبصراحة أنا قلتهالك
كلمة عايزة أسمعها منك
أى كلمة تكون فى بالك
***********
بان عليكى إنك موافقة
لما كلمتك ساعتها
قلتى أفكر... قلت سيبها
فى الدلال تاخد راحتها
***********
إنتى كنتى موافقة فعلا ً
زى ما حسيت دا منّك؟
والّلا كنتى رافضة أصلا ً
بس ما فهمتش إيه قصدك؟
************
هوا أنا اللى كان فى بالك
لما قلتى سيبنى أفكر؟
واللا كان حد فى خيالك
لو كده.. طب ليه هننكر؟
************
لو واحد تانى فى قلبك
قولى أيوه وبصراحة
لو معاه هتلاقى راحتك
راحتك إنتى ليا راحة
************
فسريلى ليه سكوتك
الكلام دلوقتى عندك
إللى عندى قلتهولك
بس أنا مستنى ردك