فيسبوك
واتساب
اقطع مَيَّه أفصل نــــــور = يزهق شعب يطق يغـــور
تمشى الزحمة من حواليـنا = نلقى الدنيا فرح وسرور
نلقى شوارع فاضية هدوء = ونمنع ماس وشرار وشرور
إزاى ويَّانا تعيش متهنى؟ = خلاط تكييف تلاجه تدور
إيه يعنى فرن العيش تتعطل = دى حسابات مش فى المنظور
أو حتى مريض محتاج لمراوح = بندرب فيه على حر قبــور
نجفف لحمه بلاش تجمــيد = وعلاجنا يتلف يبقى عطور
تلميذ بيذاكر مش موضوعنا = يعنى يا سيدى هيكون دكتور؟!
تخفيف أحمال والنية سليمة = بنوفر قرش لكل فاتــــــور
وكمان تتذكر معنى الغارة = تسمع صفارة تروح مستور
والضلمة تجدد مجد قديـم = كلوب وشمعة فانوس بانور
ومن فوايدها النسل يزيد = والنظر بيقوى كإنه نســور
دفايه لبردك مش مطلوبة = اقفل شباك والبس كسـتور
عايز تنوَّر هاتلك دينامـو = كهربة ناشفة جديد مسحـــور
دا النور بيزوِّد حبس حرارى = خايفين على بيئة أزون وبحور
تليفون وياك يدور بحجـــارة = وهسخن مكوى بغاز وبابــــور
وهشغل بيتى بطاقه شمسية= دا حلم حقيقى ف كل عصور
بيقولوا تخفيف أحمال فى الحر =والحر بيجى فى كل شهـــــــور
صورة أرشيفية
