محمد عمر يكتب: حُبِك خلانى شاعر

فى جمالِك بلقى كل جمال
وفى كل جمال بلقى جمالِك
مهما أوصف فيكى إيه يتقال؟
دا العقل يتوه جوا دلالِك
××××××××
حبك دا كإنه ساحر
حبك خلاّنى شاعر
برسم أجمل مشاعر
ومفيش لمشاعرى آخر
بمشى وكإنى طاير
هايم فى هواكى حاير.
×××××××××
انتى السما الزرقا
وانتى نجوم الليالى
انتى القلوب عاشقة
وانتى الحب المثالى
انتى الحلم الجميل
اللى منوَّر خيالى
×××××××××
انتى عشق الصبايا
وانتى غرام الحبايب
انتى أجمل حكاية
تحكى عن قلب دايب
انتى الوحى اللى يلهم
الفكرة لكل كاتب
××××××××
انتى عبير الزهور
وانتى جمال الربيع
انتى موج البحور
وانتى اللحن البديع
انتى الدفا والنور
وانتى القمر الوديع
××××××××××
انتى الفجر اللى طالع
مع يوم نادى وجديد
انتى الأمل اللى راجع
وانتى بُكرة السعيد
انتى فوق كل م أوصف
مهما أقول ولا أعيد
××××××××××
انتى الشمس الجريئة
تطلع الكون ينوَّر
انتى النسمة الرقيقة
تفرش فى الجو عنبر
وانتى البسمة البريئة
فى وش الطفل الصغيَّر
××××××××××
انتى فى عينيّا أنا
أحلى ما سبحانه صوّر
محتاج مليون سنة
علشان عنِّك أعبّر
مهما هقولِّك أنا
انتى أجمل وأكبر