دعاء مصطفى تكتب: 100 ألف جنيه للواحد.. مين يموت الأول؟!

فى مقالى اللى فات عبرت عن غضبى الشديد من جميع مؤسسات الدولة، واهتمامهم وخوفهم على المنشآت أكثر من المواطن، بس الصراحة هما مخلصهمش زعلى، وقرروا أن لا منشآت ولا مواطن، وعلى سبيل المثال سقوط كوبرى المشاة الذى راح ضحيته 4 أشخاص وإصابة 12 آخرين، ولكن "مصائب قوم عند قوم فوائد" فقد تقرر جعل المواطن اللى راح بـ 100 ألف جنيه والمصاب 25 ألف جنيه يعنى بقى "الميت أبقى من الحى" ولازم الواحد يموت عشان أمه وإخواته ولا مراته وولاده يعيشون.

وكمان تم إعادة استئناف البالون الطائر بعد التأمينات المشددة وذلك برفع قيمة التعويض على الراكب فى حالة الوفاة ليصل إلى 100 ألف دولار، بينما الطيار 20 ألف جنيه مصرى، والبالون نفسه بــ 35 ألف دولار، على حسب حمولة البالون من الركاب، مع العلم أن التحقيقات لسه مخلصتش.

حتى المترو بقوا يوزعوا ورق ويأكدون أن فى حالة أى حادث لا قدر الله هناك تأمينات على المواطن "تحديداً الخط الجديد"، طيب ليه منأمنش كل حاجة من الأول ونخليها صالحة للاستخدام الآدمى، عشان لما يحصل حاجة يبقى قضاء وقدر مش إهمال وكسل.

ولما الدنيا زى الفل أهو وعندنا فلوس، طيب ليه فى فقر ومرض فى مدينة زى أبو قرقاص بالمنيا وتحديداً" قرية كوم الزهير" اللى أكيد ناس كتير هتندهش أنها مدينة فى مصر حائزة على أعلى نسبة فى الدمار مفيهاش وحدات صحية ولا وسائل مواصلات ولا مياه ولا نور والأهالى بتعانى من الفقر والمرض وكل يوم مش أقل من اتنين تلاتة بيموتوا بأمراض سرطانية وبفيروس الكبد c بسبب المياه الملوثة وأوبئة ومحدش بيفكر يسأل فيهم إلا وقت الانتخابات!

ده غير قرية صالح باشا، بنى عمران ، كوم الزهير ..... إلخ كل ده فى المنيا بس!

ببساطة لأنهم مش فى القاهرة ولا إسكندرية لأنهم بعيد عن العين زى ما بنقول ولا نحتاج غير أصواتهم اللى قريباً جداً مش هنلاقيها، ولكن لو أجهدنا العقل قليلاً وفكرنا هنلاقى أن النهاردة عندى بكرة عندك، مع العلم أن هؤلاء يعانون منذ زمن وليس بجديد ولكن من العار أن يظل الحال هكذا بعد 25 يناير.

يا سادة عيشوا المواطن قبل أن تقتلوه فهو ليس بحاجة للفلوس والشفقه بعد موته بل هو فى أشد الحاجة لحياة كريمة.

وأعتقد أن هؤلاء أهم بكثير من الجرى وراء هوس برامج التوك شو والبرامج الساخرة والأصابع الخفية الوهمية.
ولا أعلم من أين يأتى المسئولون بكل هذه الأنانية واللامبالاة وما الذى سيصيبهم إذا عملوا على نهضة مصر ولا أقصد طائر النهضة، ولكن فى بلادى بس لا شىء يفوق مصلحة الجماعة ولا إيه يا جماعة؟!