نصر فتحى اللوزى يكتب: " تعـــالوا "

حاجات قديمة قدم الزمان
مع ميلادها هبة من الرحمن
قديمة جديدة قدام العيون
فات عليها قرون
ياما أسعدت من العالم قلوب
كانت للنور دروب
اتكحلت بها عيون
أسرارها حب تحت الجفون
اتكسرت
اتخربت
كانت زى نور القمر
كانت زى خيوط الشمس
فوق الشجر
مترتبه
اتبعترت
كان مرسوم عليها بسمة أمل
للهلال والنجوم اتزوقت
كان عليها من جدى ملامحه
واحد تانى كان بيصافحه
يمكن فى عيد ميلاد؟
بس أكيد دى فرحة عيد الحصاد
كتب حروف فهمناها
عرفناها
كتب عليها حدوتة النهار
رسم بالحب شمس على كل دار
كان مجدنا من مجدهم
كان عزهم
كان المحفور بتجرى عليه دمهم
كان عزفهم
لسه سامعه على أجمل الأوتار
تغاريد الطيور فوق صفحة النيل
فوق سطح أجمل الأنهار
حاجات قديمة
خدوا منها للطب للهندسة
أسسوا لكل علم منها للعالم مدرسة
حاجات اتكسرت
حتى الحيطان بالشخبطة اتشوهت
ألوان بتصرخ
ليه الريشة ضلت طريقها للجمال؟!
ليه مشاعرى اتلوثت؟!
ليه أحلامى بخلطة الألوان اتلطخت؟!
تعالوا نعيد للعروسة فستانها والطرحة
تعالوا نجدد فيها كل يوم فرحه
تعالوا نبنى كل اللى انكسر ونعيد
تعالوا نخلى لمصر كل يوم عيد
تعالوا نخلى كل شوارعنا للأناقة
علامة
تعالوا بالأمن نحقق لها كل السلامة
تعالوا بعرقنا نحقق التصدير
تعالوا نبقى سوا
يبقى الخير زى مطر علينا غزير