صبرى إسماعيل يكتب: مصر بخير

مصر اللى سيدى النبى وصّى عليها كتير
ونوّرت أرضِنا بأشهر المشاهير
ليه يتحرق دمّها وتزعلّوا الأهرام
والنيل يطفّى يلطّف لاجل تبقى بخير
*****
طول عمر مصر الجميلة والجمال طبعها
ولمّا كانت بتضحك ياه على ضحكها
بالبسمة تلمع عينيها والأمل بيبان
والحُزن يهرب يولّى.. قولو مين زيّها
******
المصرى مُشرِق بطبعه ودنيته أعياد
النُكتة تطلع تدوّى تكتب الأمجاد
لا الفقر يهزم ولا مهما مشاكل الكون
ولا حد يكسر محبّة مصطفى وعماد
*******
الحُب جامع قلوبنا كلّنا ع النيل
والمصرى يقلب مواجعه كلّها مواويل
مهما تحاول تفرّق مستحيل هتنول
واحنا اللى منّا العباقرة مصطفى وزويل
*******
مصر الرجولة وشوفوا الدم فى بارليف
تضحك وتمرح وساعة الجد زى السيف
إحنا بُناة الحضارة واسألوا مينا
يشهد وادينا ويهتف فى الحضر والريف