السيد عبد الكريم أحمد يكتب: كتاب الإنجازات

كتيب الإنجاز فيه كلام كتير مش مفهوم
وعلشان تفهمه لازم تعمل عليه زووم
هو ده مرسوم رسمى بالشعار مختوم
أم أن الجماعة أرادت أن يكون المجهول معلوم؟
سعيهم مشكور على العموم
رئيسنا منذ ولايتك شايل الهموم
يا متولى توكل على الحى القيوم
إحنا عاوزين البلد تنهض ومن سباتها تقوم
علشان كدة أنا بادعيلك بالتوفيق تلات مرات فى اليوم
مرة فى الصباح ومرة بعد الظهر ومرة قبل النوم
ومرة عند اللزوم لما بشوف مظاهرة تقوم
وسيادتك إن انصلحت انصلح كل القوم
وإن كان الطريق ملبد بالغيوم
بكرة ينقشع وضوء النهار يدوم
والأشية تبقى معدن ونقول للعنب كروم
وبدل ما نحمر باذنجان نحمر المشروم
وبدل الفول نأكل فى كل وجبة لحوم
ويأكلها معانا كل من بقاله سنين محروم
ونشوف الجنيه قوى وبمزاجه فى أى وقت يعوم
ولا أشوفه يندثر زى القرش اللى كان من الناحيتين مخروم
وزى ما زرت روسيا زور ميت نما وزور ميت أبو الكوم
وإن اعترضت عليك بورسعيد بتحبك الفيوم
سيادتك قلت ليس لك حقوق وأنك للشعب خدوم
سواء من يؤيدك أو من متحفز للهجوم
أنا بصراحة فى بعض التيارات مصدوم
لما بتنتقد ساعتك وبتنتقد الهدوم
سيبك منهم وشوف مواطن زيى مليان بالهموم
فترة فيها المولوتوف يتقابل بالعصا والشوم
أنا لا إلى هؤلاء ولا إلى هؤلاء مضموم
أنا حقى بين رحى الاثنين مهضوم
اعذرنى أنا مواطن ظل لسنوات مكتوم
ولا عاوز أكون ظالم ولا أكون مظلوم