محمد زكريا حبيشى يكتب: غنوة موصوفة

وخايفة ليه تقوليها
وقافلة قَلْبك المَرّمرّ
بُحور الشوق تداريها
وحاسة بأنه مِدْمّر
ولفة فوقه ميت لفة
وخوفِك إنه يتحرر

مفيش يوم حُب خان صاحبه
مَدام كان مَصْدره صادق
سِبيلى مشاعرك الحلوة
يداعبها حنين عاشق
معاكى حياتى شىء تانى
معاكى الدُنْيا تتصادق

شفايفك غِنوة موصُوفة
ومعْزوفة ف شُريانى
وحضنك منى يسرقنى
ويسبقنى لأحزانى
وعارف كل شىء عنى
وبفتكره وينسانى

سبيلى قلبك الطيب على راحته
وخلى كُل شىء فيكى بيتكلم
د ياما العُمر خَد منك ولا ادالك
وليه ترضى بإن القلب يتألم

خُدينى جوه ف عْيونك وغطيني
ف قربك كل شئ فيا وجواكى بيستسلم
تعالى قَرّبى مِنِّى وضُميني
يا ورده حلوه دارتها كفوف خوفى وبتسلّم

كيانى قبل ما يشوفك وراكى يطوف
سنين وسنين يا روح قلبى يا نور عينى
تعالى واسْكُنى فيّا أنا الملهوف
تعالى إفردى شراعك وهاودينى

وليه بتعانْدى أنْفاسك وبتْحاسبى
ضميرك لو فى يوم جانى يقرّبنى
وبتدوسى كتير فوق كل إحساسك
ولكن بلقىَ شئ جواكى دوٌبْني
ويكتب عِشق ف عيونك وبِتدارِى
وف الآخر حَنين جواكى يُطلبنى