مصطفى محمود أبوإبراهيم يكتب: بسم الشعب

بسم الشعب تسمعها
تقول الله
خلاص الغلب راح يرحل
يتوه فى سماه
وبسم الشعب يحيينا
يجدد الأمل فينا
وبسم الشعب ثورتنا
جمعتنا وخدتنا لنور الحق
وصرختنا للظالم نقوله لأ
وتِعبَانهم خرج م الشق
يلدغنا يسممنا
وننسى الحب
وبسم الشعب خدعونا
وباعونا بسم الشعب
وضحكوا علينا نسيونا
ونار الظلم يسقونا
وكله بأسمى أسامينا
ما إحنا الشعب
وبسم الشعب صفقاته
وعسكر ينجى بحياته
وشعب على نياته
وبسم الشعب
صبح واصى كده علينا
يحرمنا ويعطينا بسم الشعب
ويحكمنا ويركبنا بأى ذنب
وكله بسم الشعب
يروح ظالم وييجى ظالم
ونشكى وربك العالم
كفايه كدب
وكله بسم الشعب
ييجى بعِمة ييجى بذمة
يأكلنا يجوعنا
مادام فى خطابه الكلمه
بسم الشعب
بتخلى الدموع غنوه
وإيه الذنب
لما الشعب
إيديه طايله
يدوب الصعب
وبسم الشعب
طوق ناجى للتزوير
وبسم الشعب
بتخلى الحرامى أمـير
وبسم الشعب
قدم السعد له ياناس
ده خلى الشعب
صبح فاقد لكل إحساس
وبسم الشعب ضربونا
وبسم الشعب سحلونا
وبسم الشعب هنا الأحرار
وبسم الشعب دول أشرار
وجوه السجن مطرحنا
وبكره من مصر هايطيحنا
وكله بسم الشعب
وآه ياشعب شبعت غُلب
وكل يوم هنا الجورنال
بيحكى اللى عاوزه قرار
وخبر صادق معاه أسرار
فى ديله كتير أخبار
لكن.. كلها كدب
ياعينى وبسم الشعب
وشعب لا ينطق الكلمه
وهو معاه الهمه
قدر يدخل قلب الشعب
ويعرف كل أحلامه
ويحكى كل آماله
ويحكم بسم أولادهُ
خلاص هو كل الشعب
ياريت الكلمه تتغير
أصل الشعب إتحير
وخليها بسم العبد
ولا يهمك وكله شعب