محمد حامد حسين يكتب: مولوتوف.. مولوتوف

مولوتوف.. مولوتوف
اضرب.. خرب.. احرق.. شوف
واللى ما ماتش
يموت من الخوف
املأ إزازة وفيها بنزين
وتبقى جنازة وشيلة طين
يالا معانا يا متظاهرين
ثورة إيه ده انتو الملاعين
مولوتوف.. مولوتوف
أول مرة فى مصر نشوف
حرب شوارع.. كر وفر
فين الأمن.. قاتلنا الخوف
فين الرحمة يا مصريين
صحوا ضميركم يا وطنيين
يالا تعالى بألف جنيه
ألبس وش وخبى عينيك
ولو جه حد وكلبش فيك
نعمل وقفة ونجى عليه
املأ إزازة وعدى السور
اخرب ولع.. دمر ثور
اقطع شارع.. حط حديد
ولو مت نقولك يا شهيد
هات من الشارع كل السوء
بألف جنيه وبرشامة تفوق
يالا تعالوا ندمر شرطة
واحدة بواحدة.. ناجحة الخطة
وزى ما قالوا نمشى نسوق
يالا نخليها هوجة وفوضى
دى مش ثورة دى كلمة أونطة
ها جيب رجليهم باستفزاز
حَدف طوب.. كسر فى إزاز
ونعمل أزمة كمان فى الجاز
وهو ده اللى بحلم بيه
ويكون لينا هو الإنجاز
يالا نخلى الأمن مُدان
ونسود أزهى الألوان
ونسد لهم كل طريق
ونحسسهم تانى بالضيق
وأنت يا مولوتوف تبقى برئ
مولوتوف.. مولوتوف
واللى ما ماتش
يموت من الخوف