"أكيد ساعتها الملايكة فتنوا عليك!" قصيدة لـ"أشرف الشافعى"

قعدة صحاب..
من ثانية واحدة انفضوا من حواليك
وسابوك بترمى بخوف..
نظرة عطش للبحر
وضحكة م القلب لشوارع قربت تنساك !
ريحة دفـا مرعب..
ف حضن " همسة " وروحها بتحايلك
رعشة ايديك ع الـ "هاند باج" وانت بتطمّن..
خايف تكون سهتك..
و "خبت الباسبور " !
نظرة " محمد " قبل ما يشيل الشنط..
ودموع ملجمها..
ولغوشة ضحكه اللى هربان من دراما البعد
شبَطَان "جيهان" فيك وانت بتبوسها !
وعياطها لما حضنْتها وقلت: " أنا راجع" !
ونهنهتها الحاسة بالخدعة
أكيد ساعتها الملايكة فتنوا عليك !
وقالولها: " لأ كداب " !
ضحكة مش لايقة على سيناريو الوادع
لحبيبة خبت قلقها وخنقت اللهفة
ندم القلوب اللى حضنت بعض ف المطارات..
على كل لحظة قرب ماعشتهاش
وكلام بيتلكع..
ويعيد 200 مرة ف وصايا السفر
نيه رجوع. .
متمزعة بين الدفا والجوع
مرعوبة ليخيب ظنها ف الوطن
كادر مفاجىء لانتحار البوح
وروح بتبكى وهى بتفارق..
كيانك المدبوح
وبدل ماتطلع للسما وترتاح..
مغصوبة تقضى إقامة جبرية..
ف كيان جديد مجـروح؟