الجزمة اللى انا لسه شاريها
اتقطعت منى وانا مروح
اتقطعت ولا حاسس بيها
مع ان انا ماشى وبطوح
العيب من عندى وبدلع
وسايبها فى رجلى وبتولع
وبمرن فى صوابعى عليها
الجزمة اللى انا لسة شاريها
فهمنى صاحبها انها غالية
والغالى مالهش غير الغالي
وادانى على الجزمة ميدالية
ودا لاجل ما يتحسن حالي
ورسملى طريقى على الجزمة
وادانى هدية فوق الجزمة
وحكالى حكاوى عن الجزمة
وكانى الجزمة ماهش ازمة
غير انى انط فى معاليها
واتنك على غيرى واشوح
دى الجزمة اللى انا لسة شاريها
اتقطعت منى وانا مروح
فكرت وقلت هرجعها
وهعيد فى طريقى اللى بدأته
قال يعنى صاحبها اللى قطعها
ما هو قالى انى الجزمة بتاعته
ورجعت لقيت الشبيح
بيقولى الجزمة ماهيش راجعة
بيقولى وفى عنيه تلميح
ولا فارق وياه السمعة
انا كنت ضربتك على ايدك
انا خدت فلوسك وعليها
وفضلت اعيط وانوح
دى الجزمة اللى انا لسة شاريها
اتقطعت منى وانا مروح
والاخر قالى هغيرها
بعد ما خلانى اتذليت
وانا فاكر غيرها بغيرها
قبل يا ناس ما اوصل للبيت
نفس القطع ونفس الجزمة
نفس الرابطة ونفس الحزمة
فكرت وقلت هرجعها
ويا عالم ايه اللى هيحصل
ما هو خدها الجزمة ورقعها
واتقطعت قبل انت ما توصل
استعوض ربك يساويها
ومسيرها هترجع تتصلح
دى الجزمة اللى انا لسة شاريها
اتقطعت منى وانا مروح
