نصر فتحى اللوزى يكتب: شفت فى منامى

شفت فى منامى اللهم اجعله خير.. آل ايه إن ما ينفعش لبلدنا فى الظروف اللى احنا عايشينها دى إلا حكومة تكنوقراط.. وشفت واحد لابس أبيض فى أبيض.. قلت له أنا مش فاهم يعنى ايه تكنوقراط.. قاللى شوف يا ابنى أنت لما بتمرض لا قدر الله بتروح لمين؟ قلت له باروح للدكتور المتخصص فى نوع المرض.. قاللى الله ينور عليك.. وبمناسبة النور لما تحب تنور بيتك بالكهرباء بتجيب مين؟.. قلت له باجيب الكهربائى المتخصص.. قاللى ولما تحب تزرع الأرض على أسس علمية بتسأل مين؟.. قلت له باسأل المهندس الزراعى.. قاللى ولما تحب تبنى بيت تجيب مين؟ قلت له أجيب مهندس للمبانى.. قاللى ياريتك تكون فهمت يعنى ايه حكومة تكنوقراط.. قلت له طبعا فهمت يعنى كل وزير فى الوزارة الجديدة يكون حاصل على الدرجات العلمية دكتوراه فما فوق ويكون مالوش علاقة بالأعمال الحرة يعنى يكون جاى من الجامعة أو من مراكز البحوث.. قاللى كلام واضح بس عايزك تضربى لى مثال.. قلت له أبويا موصينى مضربش حد.. قاللى يعنى قول مثلا وزير الصحة يبقى ايه؟.. قلت له يبقى طبيب (دكتور) جاى من كلية الطب.. طيب ووزير الإسكان؟.. قلت له يبقى دكتور جاى من كلية الهندسة.. قاللى طيب ووزير الزراعة؟ قلت له يبقى دكتور جاى من كلية الزراعة.. قاللى كويس إنك فهمت.. سؤال أخير طيب ورئيس الوزرا يبقى جاى منين ياواد يافتك؟.. قلت له يبقى جاى من كلية يكون بيشتغل فيها أستاذ فى الاقتصاد وكمان يبقى متخصص فى السياسة يعنى يكون دكتور دقرم يبقى عارف من أين تؤكل الكتف.. قاللى لو جاوبت على السؤال ده هختارك وزير... سألته يعنى أكون وزيرا؟.. قاللى آه بس جاوب الأول.. علشان تنجح فى وزارتك تعمل ايه؟.. قلت له هحط خطة عمل ماتخرش الميه.. وأحقق الأهداف بالتنسيق مع زمايلى الوزرا.. واختار مستشارين فى حدود حاجة العمل يعنى مش هجامل حد على حساب فلوسنا اللى بقت ربنا اعلم بها.. قاللى وايه كمان.. قلت له ومش هكون مستبد برأيى إنما رأى الأغلبية هو اللى همشى بيه علشان أحقق المصلحة العامة.. كمان أنا نسيت أقولك إنى هكون متفرغ تماما للوزارة يعنى مش هيبقى لى شغلانة غير أنى أمخمخ كدا وأخطط صح وأنظم الشغل كويس وأختار الموظفين كويس، وأحط كل واحد فى المكان اللى يستحقه وانسق بينهم وانسق بين وزارتى والوزارات التانية وأوجه بما يرضى الله وأراقب الشغل عن طريق رجالة يكونوا على مستوى المسئولية وأصحح الغلط مش أقعد أتصيد الأخطاء وأدخل فى مشاحنات تبعدنا عن أهداف الوزارة وأقدم تقاريرى لرئيس الوزرا وأناقشه وأقبل توجيهاته علشان بلدنا تعدى المرحلة دى.. بذمتك مش أنفع وزير؟.. بس قبل ما أسمع الإجابة.. أنا اللى عايز أسألك هى تكنوقراط دى؟ إنجليزى يا مرسى؟.. قاللى لأ.. دى يونانى.. وصحيت على صوت الست زوجتى بتقوللى قوم يا سبعى غير أنبوبة البوتاجاز.