محمد زكريا حبيشى يكتب:اقفــل يا قلبـــى

اقفل جراحك وبايديك
واوعاك تآمن للحبيب وتحس بيه
عُمره ما فكر لحظة فيك
والجرح ساكن بين بيبانك وتداريه

هو الفُراق ولا الخِداع مكْتوب عَليك
والكُل بيْكسّر ملامح ضحكتك
وأما ف يوم تلقىَ الفرح رايح عليك
بتلاقى ناس تجرى و تزرع دمْعتك

جوانا ليه شلال جِراح ويّا الحياة
والحُزن مش عارفين نِهايته وأوِّلُه
مين اللى محتاج يسْمعك تُصْرُخ بآه
مين اللى مفروض تبّعدُه وتبدّله

هو انت ناوى تعدْى كُل عمايله فيك
هتسامحه تانى وتيجى برضه تدوق خيانة
جَرْبت حظ كتير معاه وانا قولت ليك
ما بقاش ف لازمه تنجرح وتشوف مهانة

وكفايه يا قلبى خلاص بالله عليك
ولا انت أَدمنت الخضوع ف بحور ألم
كل الطيور بتغنى للكون إلا ليك
وبيرسومنا صورة سودة بالقلم

نفسى ف يوم تبعد يا قلبى عَنّهُم
داوى بإيديك الظُلم يوم واوعاك تفكر
أصل اللى حاول يقتلك يوم منهم
يزعل لو أنت تعيش سعيد والحُب يكبر