سيد أحمد الهمشرى يكتب: إلا الإساءة للقضاة

لا مؤاخذه يا معالى الرئيس إلا الإساءة للقضاة
اللى لولاهم كان زمان نص البلد فى الظلم تاه
هما سندنا فى المحن والدرع لو غدر الزمن
هما الميزان اللى عليه شيدنا أعمدة الحياة
...
لا مؤاخذه يا معالى الرئيس لازم يكون للناس كبير
لو جار عليهم الزمن يفضل ملازهم الأخير
ميزان العدالة بين ايديه وكلنا نرجع إليه
يحكم بتنزيل السماء بين الرعية والأمير
...
لا مؤاخذه يا معالى الرئيس قولى جماعتك رايحة فين ؟
ماشيين على نفس الطريق اللى رفضناه من سنين
وحضرتك نفس اللى كان راكب على كتافنا زمان
الفرق بينكم انكم بتقولـوا (إخوان مسلمين)
...
لا مؤاخذه يا معالى الرئيس لازم تغير سكتـك
وبلاش تطول على قلبنا وحياة ولادك قعدتـك
وبلاش تقولنا (إنجازات) كفايانا أكاذيب اللى فات
اللى ضحك لنا فى القفص وعايرنا بوعود حضرتـك
...
لا مؤاخذه يا معالى الرئيس أنا مش هطول فى الكـلام
لكن هقولك كلمتين لازم أقولهم والسلام
خفف معانا قعدتك واحرمنا من نور طلعتك
ويا ريت تقولنا بالعجل أنت هتمشى الساعة كام
...