عبد الحميد بدوى يكتب: مشروع النهضة يا مشروع

مشروع النهضة يا مشروع
وليه تنتخب شخص
طالما ممكن تنتخب مشروع
يامسمع يا مسموع
يا مشبعنا بعد جوع
هو ده اللى
هايوقف مصر على رجليها
وهايسدد اللى عليها
من النهاردة مفيش ركوع

قولوا فيه قصايد
وانكتب فيه كتب
قولوا مشروع حياة
وقولوا طوق نجاة
وقولوا فيه الخير لكل البشر
وقولوا كل حاجة فى مصر
هاتغنى حتى الشجر
وهو اللى هايخلى
مصر أقوى من الزمن

وقولوا هو الملاذ وهو الأمل
وقولوا دا مشروع وطن
وقولوا هايحتاج كمان
كام مليون فرصة عمل
وهو ده اللى المشروع
اللى بجد هاينقل البلد
أفرح وأرقص يا ولد
وقولوا كمان اشتغل عليه
مهندسين وخبراء واقتصاديين
وعلماء فى الطبيعية
وعلماء فى الفلك
وقولوا فيه كلام كلام عجب
وفى الاخر طلع المشروع قلة أدب
المشروع الوحيد اللى
محتاج مشروع

افرحوا وغنوا يا بشر
واللى يقولك أصله
طلع مشروع فكرى
وفى ناس كتير
بتقول إن فكرى انتحر
وللأسف كل وكالات الأنباء
مش قادرة تتأكد من صحة الخبر

أنا بحب الإخوان
وبحب الرئيس المنتخب
وراضى دايما بالقضاء وراضى بالقدر
بس كل أما أشوف حالى اتحسر
أصل أنا حالى من حال الوطن
وعايش الحياة مستنى الكفن
ولو سألونى نفسك فى أيه
أقولهم نفسى أشوف مشروع النهضة
ولو حتى من بعيد
نفسى ياناس ألمح طيفه
نفسى أخده فى حضنى وأبوسه
وأقوله اتأخرت ليه
وحشتنى يا ابن الأيه
مصر قدامك شوف هاتعمل فيها أيه
لو تعرف أحنا بنحبوك قديه
كنت اتخلقت من العدم
افرح وارقص يا جدع

نفسى أشوف كل حاجة فى مصر
لابسة جديد فى جديد
وما يبقاش فيه أسياد وعبيد
والمواطن هو الحلم والأمل الوحيد
نفسى أشوف البسمة فى عيونك
نفسى أشوف ضحكتك ورقة قلبك وجنونك
بدل حزنك وجرحك وهمك وغمك شكلك الكئيب
ليه يا وطن حتى عن نفسك بقيت غريب