د. أحمد العربى يكتب: "اعرفنا كويس" إحنا المصريين

- لو سألت سواق تاكسى على عنوان وبدل ما يدلك قالك امشى ورايا.. يبقى مصرى.

وعلى فكرة ساعات بيغير اتجاهه عشان عنده رغبة صادقة يوصلك وخايف تتوه

- لو صليت فى مكان وبعد الصلاة اللى جنبك مد ايده وقالك تقبل الله.. يبقى مصرى

- لو سمعته بعد ما يضحك كتير يقول "خير اللهم اجعله خير".. فتأكد أنه مصرى...

- لو دخلت عليه وكان بياكل ولو حتى عيش وبصل لازم يقولك اتفضل الأكل ويعيدها عليك ثلاث أربع مرات.. يبقى مصرى

- ولما عربية تعمل حادثة فى الطريق الصحراوى أو الزراعى، وفى ثوانى تقفلها خمسين عربية ينقذوا المصابين ويعدلوا العربيات ولو اضطروا يشيلوهم من على الأرض.. هم دول المصريين

- لما تلاقى ناس بتقضى العيد فى المقابر مع حبايبهم اللى ماتوا يبقى أكيد فى مصر

- لما تلاقى سيدة فى الرايحة والجاية عمالة تدعى لأولادها وتخلى الدنيا كلها تدعيلهم... تبقى دى أم مصرية وطموحاتها وأحلامها الشخصية فى الحياة إن ولادها يبقوا مبسوطين

- لو شفت واحد وقف فجأة وهو ماشى فى الشارع ومد ايده على حتة عيش مرمية على الأرض وقام رافعها لراسه قبل ما يحطها جنب الرصيف... يبقى ده مصرى.

- لو شفت عامل أول ما خد أجرته قام رافعها لراسه وبص فوق وحمد ربنا قبل ما يحط الفلوس فى جيبه... يبقى مصرى.

-لو إديت لواحد فلوس وبدأ يعدها بصوت عالى وبدأ بقوله الله واحد.. ومع الورقة الثانية: مالوش تانى، ومع الورقة الثالثة: العدد ثلاثة.. يبقى أكيد مصرى ابن مصرى

- لما تلاقى خناقة فى الميكروباص والأصوات عليت كل واحد فيهم بيحلف إنه يدفع للتانى ثمن التذكرة

- لما تلاقى ست البيت بتحوش برطمانات المربى الفاضية سنين طوال بدون استخدام يبقى أكيد دى مصرية

- لما يكون عندنا ضيوف ويسلموا عشان هيمشوا ويقفوا على الباب يتكلموا ساعة يبقوا مصريين مصريين

- لما تلاقى إننا شايلين أكياس من جميع الأشكال والألوان تحت المرتبة نبقى مصريين

- ولما تلاقى شعب فى أكبر أزمة بيمر بيها... مابينساش يضحك ويطلع إفيهاااات ويضحك اللى حواليه وكل العالم يتكلم عليه وعلى خفته