راضى على الطهطاوى يكتب: البراءة

براءة يا سادة يا كل اللصوص
بفضل الأدلة وحكم النصوص
ونأسف حقيقى جرحنا شعوركم
وأنت يا باشا بوجه الخصوص
**
براءة ونعمل حفلة وزار
دا مقلب سعادتك وحتة هزار
براءة براءة وحقك علينا
وشعبك يقدم إليك اعتذار
**
بمبى يا بلدى وجوِّك ربيع
براءة براءة لكل الجميع
براءة براءة براءة تمام
وحقك شهيدنا دا لازم يضيع
**
عاجل وفورى وجدا ً وهام
مجرم وقاتل بيصبح همام
ويرفع قضية رد اعتباره
وثورة هتدخل فى حكم اتهام
**
براءة يا باشا براءة يا بيه
شهيدنا إللى مجرم وحقك عليه
وشعبك دا ظالم وناسى جمايلك
ومين إللى غيرك طلــَّع عينيه

**
دخلتم طلعتم بألفين سلامة
قضية وماتت ماليها علامة
قانونا دا واسع محيط وغويط
قانونا يا باشا بيخشى الملامة
**
اضحك فى قفصك وشاور بإيدك
قاعدة عصابتك ولسه تريدك
راجع تشاور تغيظ اللى جابنا
وشعبك دا كله ما يقدر يكيدك
**
مين اللى داخل فندق وخرج؟!
براءة يا باشا وجاك الفرج
قانونا داعادل يدين البرئ
قانونا ياباشا بيخشى الحرج
**
حلاوتك يا ثورة يا أجمل غرامى
بتدى البراءة لمجرم حرامى
حرامى وحاطط فلوسنا ف سويسرا
وإحنا بنشحت ف مشهد درامى
**
لساك يا باشا شباب وعريس
ومكياج جنابك دى موضة باريس
شاور بإيدك وابعت رسالة
بإنك هترجع تانى رئيس

براءة يا بلدى وتسلم عيونك
وتسلم مشانقك ويسلم قانونك
قانونك بيعدم بس الغلابة
ويحمى الحرامى إللى دايما يخونك
**