فيسبوك
واتساب
نقطة وأبدأ بعدها شوية سطور
مين هيقدر يبنى بعد العتمة نور
هى كانت فينا ثورة ولا نهبة أو مناورة
مين معانا ومين علينا مين بيغرق ف الغرور
واحتمالات الفرح جوانا حايرة
يأس مالى وقتنا ملضوم ف دايرة
يوم ويوم بيزيد ألم بعدها بنسمع ندم
وألقى ناس بتقولى آسف. . ناس وشاطرة ف المعايرة
اختلاف الكون ما بينا شرع جايز
والثقافة ف اختلافنا الكل عايز
فيه كتير بيحب ينتش أو يعارض لجل يهبش
ناس تبيع دايماً ضميرها لجل ما يكون مرة فايز
يا أمل مصر اللى متغرب ما بينّا
إيه تساوى مصر لو شربت عفنّا
وارتضينا يوم عذابها وإنها تقفل ف بابها
يالله بينا نلم تانى زهرة الخير بين شبابنا
ارجعى تانى القوية وأقوى بينا
امسحى القسوة إللى ساكنة بين عنينا
خلى نور الصبح يلمع وسط عتمة ليل ويسطع
امسحى بإيدك مراية ظلم كانت عايشة فينا
زلزلى فينا الكرامة والحقيقة
صحى فينا العدل صحِّيه لو دقيقة
وازرعى جوانا نيلك واطلبينا ف يوم نشيلك
عمرنا ما هنرضىَ برضه إننا نشوفك غريقة
صورة أرشيفية
