قاتلة زوجها بالمرج لـ"اليوم السابع": حطيت له السم فى الكوارع وعندما فقد القدرة على الحركة "خنقته" وندمانة..واستخدمت "الزرنيخ" لأن آثاره مبتظهرش وطلبت منه إطعام أمه معاه عشان أخلص منها وكان يدمن تعذيبى

"جوزى كان بيضربنى ويعذّب عيالنا كل يوم عدة ساعات.. وكان بخيلاً فى البيت ومش بيصرف علينا وكريم جدا مع أصحابه والناس بره.. وقبل ما يموت بيومين تشاجر معى عشان دروس الأولاد وقيّد "لبنى" بالحبال من أيديها وعبد الله من رجليه وضربهما بالعصا.. ولما ضاقت بى الدنيا من تصرفاته قررت التخلص منه واشتريت 75 ملى "سم" من باب الشعرية بـ 150 جنيها وحطيتها له فى الكوارع وطلبت منه التوجه بالطعام إلى والدته فى مدينة السلام لأنى كنت عاوزة اقتله هو وحماتى مرة واحدة بس هو رفض".


هكذا بدأت "منى.م.ف"- 30 سنة - اعترافاتها بعد القبض عليها لاتهامها بقتل زوجها"محمد.إ.م" - 31 سنة عامل لف مواتير كهربائية - فى منطقة المرج عن طريق دس السم له فى"الكوارع" وخنقه بسبب المشاكل الأسرية المستمرة بينهما وتعديه الدائم عليها بالضرب وعلى أولادهما وبخله الشديد.

وأوضحت "منى" لـ"اليوم السابع": مأساتى بدأت منذ 11 سنة تقريبا بزواجى التقليدى من"محمد" 31 سنة عامل دون سابق معرفة وبعدها أنجبنا"عبد الله" 10 سنوات و"لبنى" 4 سنوات ثم بدأت المشاكل والخلافات تدب فى حياتنا وتخترق بيتنا، خاصة وأن زوجى كان سريع الغضب وأخلاقه فى البيت مختلفة تماما عن خارجه، فقد كان قاسيًا عليًا أنا وأولادى وبيضربنى على طول وبيصرف كل فلوسه على أصحابه فى القهاوى بينما يرفض دفع مصاريف الأولاد فى المدارس وقيمة الدروس الخصوصية.

وتابعت المتهمة سرد كواليس جريمتها التى تشبه فيلم"غرام الأفاعى" للفنانة ليلى علوى وهشام عبد الحميد وصلاح قابيل: فكرت أخلص منه أكتر من مرة وبأكتر من طريقة حتى استقريت على دس السم له فى الكوارع وجاءتنى هذه الفكرة من التليفزيون ففى يوم ما كنت أجلس أشاهد بمفردى فى البيت برنامج وثائقى عن محاولات اغتيال الزعماء والرؤساء عن طريق السم وكان منها الكلام عن احتمالية اغتيال الزعيم جمال عبد الناصر بالسم.

وأضافت "منى" من داخل محبسها: أعجبتنى الفكرة عندما قال المتحدث فى البرنامج أن هناك نوعا من السم يسمى"الزرنيخ" يقتل متناوله بعد فترة ولا تكتشف آثاره وعلى الفور توجهت إلى منطقة باب الشعرية واشتريت 75 ملى من هذا السم بـ 150 جنيها وعشان عارفة أن جوزى بيحب الكوارع عملت له وجبة كبيرة منها وحطيت فيها كل السم ورفضت أكل منها أنا وأولادى طبعا وصممت أن يروح بيها إلى منزل أمه"حماتى" فى السلام عشان تاخد نصيبها وأخلص منهم الاتنين لكنه رفض وتناولها بمفرده.

تانى يوم من تناول جوزى الكوارع – واصلت منى- شعرت أنه أصبح ضعيفا جدا ومرهقا ومش قادر يتكلم وملقى على السرير وهنا فضلت أخنقه بأيدى وأضغط على رقبته إلى أن خرج لسانه من فمه ومات، وبعدها استدعيت أولادى"عبد الله" و"لبنى" وقلت لهم إن أبوكم جه من بره تعبان ومات ولما حد يسألكم قولوا الكلام ده.

قالت المتهمة، مشاكلى مع "محمد" كانت مستمرة وكان لازم يكون لها حد وبموته بس ارتحت أنا وأولادى من النكد المستمر حتى أنه قبل ما يموت بيومين اتخانقنا خناقة كبيرة والجيران اتفرجوا علينا بسبب الدروس الخصوصية بتاعة الأولاد فأنا كنت عايزة المدرس يجى فى البيت وهو مصمم يعملوا مجموعة فى المدرسة عشان ميدفعش فلوس كتير، ولما الأولاد اتكلموا معاه ضرب لبنى وكتفها وربطها بحبل هى وعبد الله وفضل يعذبهم ويضربهم بالعصا ولما تدخلت ضربنى أنا كمان وشتمنى بألفاظ خارجة مضيفة: مكنش بينام معايا كتير بس مش دى المشكلة بالنسبة لى ورغم عذابه لى وأولاده لم أحرمه من جسدى كلما طلبه.

واختتمت منى حديثها لـ"اليوم السابع"،" دلوقت ابنى عبد الله معايا فى السجن وأنا عايزاه يروح البيت ويروح المدرسة عشان هو كل أملى فى الحياة ومش عارفة أعمل أيه من غيره أو أروح فين وأنا زعلانة جدا على أولادى وإللى حصل وربنا يسامحه ويسامحنا.

كانت البداية بتلقى المقدم محمد رضوان، رئيس مباحث قسم شرطة المرج، بلاغاً من "منى.م.ف" 30 سنة ربة منزل، باكتشافها وفاة زوجها "محمد.إ.م" 31 سنة عامل لف مواتير كهربائية.

انتقلت قوة بإشراف العقيد هشام قدرى، مفتش المباحث إلى منزل الشاكية وعثرت على جثة زوجها أعلى سرير غرفة النوم مرتديا ملابسه، وبه أثار أظافر وأثار ضغط حول الرقبة والخد الأيمن مع بروز لسانه خارج فمه.

توصلت التحريات إلى تواجد الزوجة وبصحبتها ابنيها "عبد الله" 10 سنوات و"لبنى" 4 سنوات وقت الوفاة وبسؤالها أكدت حضوره من الخارج فى حالة إعياء وتوجه إلى النوم وعند إيقاظه اكتشفت وفاته وأيد ابنيها أقوالها.

بعد إخطار اللواء أسامة الصغير، مدير أمن القاهرة، أمر بسرعة كشف غموض الحادث، وأسفرت جهود البحث إلى أن الشاكية وزوجها كانا فى خلاف وشجار دائم وأنها كانت دائمة الشكوى من سوء معاملته لها وأولادهما ما دفعها إلى قتله.

بعد تقنين الإجراءات ألقت قوة أمنية القبض عليها واقتادتها إلى القسم وبمواجهتها أمام العميد محمد توفيق رئيس مباحث قطاع شرق القاهرة، بمضمون التحريات اعترفت بالتخلص منه بسبب سوء العلاقة بينهما، وأوضحت أنها اشترت سم الزرنيخ من أحد المحال بدائرة قسم باب الشعرية، ووضعته له فى"وجبة كوارع "تناولها على الغذاء والعشاء وفى اليوم التالى استغلت إعياءه وضعفه وعجزه عن الحركة وخنقته حتى فارق الحياة ولقنت ابنيها موت أبيهما بعد عودته من خارج البيت متعبا لإبعاد الشبهة عنها.. تحرر لها المحضر اللازم وأمرت النيابة بحبسها على ذمة التحقيق.