السائق المفصول: انتقمت من شركة المكرونة عشان طردونى من الشغل منذ سنة.. وسرقنا 700 ألف جنيه.. ونصيبى 65 ألفاً أودعتها باسم أختى فى البنك.. والعاطل شريكه: اشتريت تاكسى بـ160 ألف جنيه عشان أعرف آكل عيش

"الشيطان ضحك علىّ وكان نفسى أخلّص تارى من الشركة بعد ما طردونى منها، وفضلت سنة من غير شغل وعشان كده فكرت أسرق الفلوس وأنا ندمان أشد الندم ومش عارف أعمل آيه وزعلان عشان خاطر أمى وأخواتى وكمان كعبلة وقزعة وبغدادى ضحكوا علىّ وخدوا باقى الـ700 ألف جنيه وكان نصيبى 65 ألف جنيه بس".

بتلك الاعترافات بدأ صابر.م" (25 سنة – سائق) سابق بشركة للمكرونة والمواد الغذائية حديثه، قائلا "قصتى مع الحادث بدأت منذ عام تقريبا بعدما طردنى أصحاب العمل من الشركة ولم أجد فرصة عمل مناسبة، ولكن كبرت فى رأسى فكرة الاستيلاء على إيراد الشركة، وأنا كنت عارف خط سيرهم من زمان وكمان عارف إن الشركة بتورد فلوس واختارت يوم الأحد عشان بتجمع فيه إيراد الخميس والجمعة والسبت 3 أيام عشان البنوك مقفولة".

وأضاف السائق الذى تزعم العصابة "روحت اتفقت مع أصحابى كعبلة وقزعة وبغدادى ومحمد، وفضلت مستنى عند الشركة وراقبنا العربية أول ما اتحركت بالفلوس، وكان معانا سيارة حمراء اللون ماركة هيونداى إلنترا تحمل رقم م ل ط 352 مصر، وعند وصولنا إلى تقاطع شارعى جسر السويس ونصوحى، طلّعنا الأسلحة النارية اللى كانت معانا وقولنا للسواق استنى ولما حاول الهروب ضربنا عليهم نار وأخدنا العربية وفيها 700 ألف جنيه إيراد الشركة قبل إيداعه ببنك سوسيتيه جنرال بشارع بيروت بمصر الجديدة.

واختتم صابر حديثه "أصحابى ضحكوا عليا وأخدت نصيبى 65 ألف جنيه وأودعتها فى البنك باسم أختى وكنت شايلهم للزمن عشان أعمل مشروع أصرف على نفسى وأهلى منه".


ويلتقط منه أطراف الحديث المتهم الثانى محمد.ص. 26 سنة – عاطل قائلا "دى تانى مرة فى حياتى أطلع معاهم وأنا زعلان جدا عشان خاطر أبويا وأمى لسة عارفين إنى محبوس النهارده ومش راضين ييجوا يزورونى ونفسى العيال اللى كانت معانا تتمسك عشان حاسس إنى هاشيل القضية لوحدى، وأنا أخدت 160 ألف جنيه نصيبى واشتريت بيها تاكسى عشان آكل عليه عيش وأعيش من حلال وياريتنى ما طلعت معاهم وصابر هو السبب منه لله".

وأضاف المتهم والحسرة تملأ جوارحه والندم واضح على وجهه، "أنا من الأساس عمرى ما طلعت مع صابر وبقية الرجالة غير مرة واحدة بس وكانت على الفاضى، المرة دى صابر أغرانى بالفلوس وقالى هتاخد مبلغ كبير فى نص ساعة وكان معانا 3 غيرنا وهربوا، والسواق واللى معاه لما رفضوا يوقفوا ضربنا عليهم نار كتير بس كانت بعيدة عن العربية.. ولكن السواق مات وسيبنا التلاتة مرمين على الأرض وغارقين فى دمهم وركبت أنا العربية وفيها الفلوس لحد لما وصلنا إلى شبرا وروحنا قسمنا الفلوس.

يذكر ان المتهم سبق اتهامه فى الاعتداء على قسم شرطة شبرا الخيمة ثان فى الأحداث الأخيرة بعدما أطلق النيران من سلاح كان بحوزته على القوات وتمكن من الهرب.

تفاصيل الواقعة بدأت بتلقى المقدم محمود الأعصر رئيس مباحث قسم شرطة الزيتون بلاغاً يفيد بأنه أثناء استقلال كل من "على.ا" (72 سنة – سائق) بشركة الملكة، متوفى، و"محمد.م" (43 سنة- أمين مخزن)، و"إيهاب.م" (37 سنة- أمين مخزن) مصابين، سيارة قيادة وملك الأول بتقاطع شارعى جسر السويس ونصوحى، اعترض طريقهم ملثمون وفتحوا النيران واستولوا على السيارة وبداخلها المبلغ وهربوا.

تم تشكيل فريق بحث برئاسة العميد محمد الألفى مفتش مباحث قطاع الشمال، وتمكنت مأمورية بالتنسيق مع قطاع مصلحة الأمن العام وأمن القليوبية من ضبط المتهمين"صابر.م" (25 سنة) سائق سابق بذات الشركة و"أحمد.ص" (26 سنة – عاطل)، وتبين من تحريات الرائد محمود ثروت معاون مباحث القسم أنهما قاما بمساعدة "أحمد.ع" (25 سنة – عاطل) "هارب" و"محمد.أ" "هارب"، و"محمد.ك" "هارب" وجميعهم مقيمون بشبرا الخيمة، بارتكاب الواقعة، وجارٍ ملاحقة باقى المتهمين الهاربين.