"كلنا خالد سعيد" ترفض تقديم "الحرية والعدالة" خدمة توزيع الخبر على المواطنين

نشرت صفحة "كلنا خالد سعيد" صورة عن صفحة "حزب الحرية والعدالة" بالفيسبوك وفيها إعلان للحزب يقول "رغيف الخبز بـ"5 قروش" فقط مغلفا وعلى استعداد توصيله للمنازل بشرط الاتصال بمقر الحزب للاشتراك بالخدمة".

وانتقدت "كلنا خالد سعيد" الإعلان قائلة: "هل من المقبول أن يقوم حزب سياسى بتوزيع الخبز على المواطنين واستغلال الخدمة فى تسجيل معلوماتهم لديه؟ خاصة لو الحزب ده هو الحزب اللى حاليا فى السلطة؟ وهل من الصواب أننا نشوف الأحزاب السياسية بدل ما تنشغل بالبرامج والأفكار الإصلاحية والسياسات العامة للبلد، قواعدها مشغولة بأداء دور موظفى الحكومة اللى بيقبضوا مرتبات من ضرائب المصريين؟".

وتابعت الصفحة "المواطن المصرى يدفع الضرائب نظير خدمات واجب على الحكومة أن تقدمها له. ومن ضمن الخدمات دى رغيف العيش. والمفروض الخدمات دى تتقدم للمواطن من غير أى دعاية سياسية".

مضيفة: "يعنى إيه عشان يوصلنى رغيف العيش المدعوم من ضرائب المصريين لازم أتصل بالتليفون بحزب سياسى وأشترك فى الخدمة؟ وإيه علاقة الحزب السياسى بتوزيع العيش؟ الأحزاب السياسية دورها قيادة البلد وسن التشريعات والقوانين اللى بتصلح من الوضع مش توزيع العيش والأنابيب"!

واختتمت بعبارة "هل ممكن نتوقع نهضة بهذا الشكل؟".