محمد زكريا حبيشى يكتب: كلمة السر

كلمة السـر اللى ساكنه
بين ضلوع اليأس فيّا هى اسمك
كلمة السحر اللى راكنه
فوق جدار القلب هى برضه اسمك
كل نقطه دم داكنه
طالبه بس تحس مره سحر رسمك

لمى شَمّل الحُب فيّا
لملمى فيّا اللى باقى ما تبعديش
صُبى سحرك بين عينيا
وازرعى روحك ف روحى لجل أعيش
ودّعى فيا القسيّـه
دا الحياه من غير عيونك ما تساويش

ليه بتزّعل كل حاجه
وأن نبض الكون بيعّطل يوم خسوفك
والحياه ليكِ ف حاجه
تفسريلها سر حُسنك يوم كسوفك
كُتر حبى مش سذاجه
بس محتاج لمسه دافيه من كفوفك

الخريف قـُربك ربيع
والحروف دايماً بترقص بين شفايفك
وان بعدتى ليه بضيع
حتى لو كنتِ قريبه وكـُنت شايفك
ليكِ قلب كبير يسيع
كل شئ جوايا محتاجك وعارفك

ألف خطوه بمشيهالك
والبحور عَديتها ليكِ لجل شوقى
والحنين اللى ف خيالك
خليهولى لحظة حلوه تبل ريقى
مين ف حسنك أو مثالك
بيكِ طعم الدنيا دُنيا شىء حقيقى