مايسة مسعود تكتب: غريب جوه بلدى

أنا ثورجى بحاربك بنظامك وبدافع عن حقى وحق كل اللى زيى..عايش فى الضلمة تايه مستنى النور ضعيف مكسور مهما أتكلم مبتسمعش، ومهما أطالب مبتفهمش لما بطالب وبعلى الصوت، إنت ترد وتضرب نار..فكرك ردى هيكون إيه ضد رصاصك أنا مبخفش أصل رصاصك مبيموتش..صوتى هيفضل عالى ضد الظلم مهما تلاقى بطلب حقى وحق أخويا أنا مش طالب سلطة وشهرة ولا عاوز كرسى.. أنا إنسان مين ينصفنى من عنف نظامك متوقع إيه لما ألاقيك عامل دولة جوه الدولة وتصرخ وتقول أنا أبقى السلطة..مين إنت؟
أنا بقى الثورة ضد مليشياتك وضد حكومتك وضد نظامك وضد رصاصك..أنا اللى كرباكك على جسمى علم ومكنتش بتكلم..أنا اللى سجنتنى وقواضى ظلم لبستنى وعمرى ضاع جوه سجنك بدون سبب..أنا اللى حددت لقمتى أنا اللى عايش غريب جوه بلدى وضعيف لومت أو دمى سال مليش ثمن..أنا اللى من الحمل اتحنيت وعشان مليش ضهر انكويت أنا اللى ياما شربت من دمى سنين والرصيف كان مأوى ليا وفى الشوارع سحلتنى أنت مين؟ وأى دين بيقولك تعمل كده؟