نظر الفقير للفقير قاله شوف المحكمة واتعجب.
.. ضرب السفير بالغفير قاله والرب هو المسبب
نظر الفقير للغنى يرتجى عطفه
قال الغنى للغنى
للقاضى عين حمرة
للقاضى إيد جمرة
للقاضى سيف وعصاية تحترم معنى القضاة
للمحكومين بالقضا معنى اختفاء الحياة
للناس شوارع تتحرق
أجراس كنايس تنضرب
وأدان بدون أصوات
وهموم متتعدش
وساحات للثورة اللى كانت ثورة الأحلام
بقت ثورة على الأحلام
للناس رغيف العيش فياكلوا بعضهم بايت
للناس طابور الحزن.. والمخبز
.. للناس الدقيق الحر والصنف المدعم حاكم
للناس حريق القاهرة وانفجار وابور الغاز فى وش المرة الحامل..
ودهس المدرعة..
وطابور السولار والزيت..
وطبق من فول الغلابة..
ورز الخان من الإخوان..
للناس أوجاع متعرفوهاش....
للناس غطا الشتا
يكفى رجلهم ...
فتتعرى عيون الفقر من راسهم..
يدفوا الراس فتتعرى شقوق الحزن فى الأقدام..
للناس متعة مشاهدة مجزرة فى ماتش كورة بيتلعب..
للناس متعة الضحك من الواد اللى مات عيان
للناس رغيف فاضى
وريحة مطعم اللحمة
وصاجة حزن مرمية من عود الفقير غلبان
