عاش مولانا
عاش الجهل إللى اتهجّانا
عاش الديب الوقف ظابط
ساعة المـــوت وبيستنانا
عاش الوطــن الحرّ الرافض
عاش الصوت مكبوت جوّانا
عاش الفقر إللى بيتنطط
ع الشبّـاك زىّ الدّبــــانة
عاش الجوع لحظة ما نهاتى
والبلح الحلو الأمْهــــــــــاتى
وسياسة عبده المــــــــلاياتى
أبو عمّة وشال وبتنجــــــانة
................. عاش مولانا
صاحب عزم وفارس ساحة
ومأنْتِم مـــــــع "بقرة حاحا"
وكإنّ أمــــه لا كات فلاّحـة
ولا كان والـــده غفير جبّانة
................. عاش مولانا
عاش وتعيش طبعا شنباته
يحلف ويرقّص عضــلاته
ويقولوا بتـوع "تسلم ذاته"
لسّه ما رقّصش السِّمـــانة
................. عاش مولانا
عاش البيه أبو شنّة وهيبة
غنـــــــــوة يغنيها الحبّيبة
وقصــــــــيدة تبشّر بالخيبة
وشعار للضّنـــك إللى شَوانا
................. عاش مولانا
صاحب فضل وخير وملاحظة
وبيفهم من أوّل لحظـــــــــــــة
وبيكبر دايمــــــــــــا وبيحظى
برِضَاهم وف داهية رضـــانا
.................. عاش مولانا
عــــــاش إللى بيحلم ويدارى
والواجـــــــب لو كان إجبارى
والشخص الأنوى "الهنكارى"
وبيوت ساكســــــونيا الخربانة
................. عاش مولانا
ابن النور والنور على إيده
بيباهى ويحلــــــف بعبــيده
وعبيده بيتمنـــــــوا يزيدوا
علشان يحتلّوا الدُّكـــــــانة
................. عاش مولانا
عاش صوته المزعج فى الدنيا
وصراخه إللى وصل مقـدونيا
عاش الصمت سرير بِسْكُـونيا
ومزاد والناس بالألمــــــــونيا
والحرّية إللى ف ســــاكسونيا
تشبه للخلق بتوع غـــــــــــانا
عااااااااش مولانا .....
عااااااااش مولانا
