د. هانى أبو الفتوح يكتب: جَنبْ الرصِيفْ !

جنب الرصيف مَرْمِى هناك
ما تقولى بس بْتِعْمل إيه
هو أنت ما بتشبعش حُزن
لازم الدموع تِغْسِل عنيه
ما اشتقش جِلْدِك للسرير
وللا الشوارع كلها عندك حرير
وللا عشان تفضل كده
مدبوح يا طير
.................
مجروح أوى لما بشوفَك
والكل بيعدى عليك
لا حد يمسح دمعتك
ولا حد شاف دم فى عنيك
......................
أعملك إيه قُول يا وطن
ولحد إمتى تنام كده
جنب الرصيف
هو أنت لازم
اللى تِقْسِم لُقْمِتك ويا الفقير
حتى الرغيف
....................
عارفك أكيد زعلان أوى
لما تشوف طفلك هناك
فتنام معاه
زعلان عشان غلبان جعان
وللا مريض مَلقاش دواه
وللا ولادك أما سابوا وحدتك
واختاروا يمشوا لوحدهم
ألف اتجاه
يتقابلوا فين.. فى الدنيا لأ
فى الآخرة آه
وقت الحساب ما يكون عليك
مش بس ركعة وكام صلاة
ما أنت عارف
أما القلوب بتكون حجر
ما فيهاش حياة
....................
ألفين خسارة جيت لك لقيت
ما فضلش منك غير بواقى
وكلمتين فى كتاب يقول
رغم اللى فيك
ورغم حبى واشتياقى
الفعل فين علشان تعيش
ما تلاقيش
اشرب كلام واشبع تِلاقى
وأفضل كده جنب الرصيف