وليد فؤاد يكتب: أنا المصرى

-1-
أنا المَصرى ..
أنا المَكتوم وأنا اللِّى بَاقولْ
وأنا المَسكوتْ برَغم الصّوتْ
أنا المَعلوم وأنَا المَجْهولْ
وأنا المَسفوك بحُكم المُوتْ
أنا البَاطِل وأنا المَبطولْ
وأنا المَغلوب وأنا الجَبَروتْ
-2-
أنا المصرى ..
أنا الحَركَات والائتلاَفَاتْ
أنا الجَمَاعاتْ وأنا الأحزَابْ
أنا التَزوير والانتهَاكَات
أنا العِصيان وأنا الإضرَابْ
أنا اللِّى بَقَرَّب المَسَافَاتْ
وأنا اللِّى سَاعَات بَكونْ كَدَّابْ
-3-
أنا المَصرى ..
أنا الإعلام وأنا الإسْفَافْ
تَمَللِّى ملَبِّس البُهتَانْ بِتُوب الحَقْ
أنا اللِّى اتْهَان وعُمرُه مَا خَافْ
تلاَقوا بَاقيلى مِ الإنسَانْ يَادوبْ الـ (لاّء)
أنا اللِّى بَاتوه بِدونْ إنصَافْ
مَا بين الكُفر والإيمَان وقَلبى انْشَقْ
-4-
أنا المصرى ..
أنا الرَّاديو وأنا السِّيمَا
وأنا اللّمبى وأنا كَتكُوتْ
أنا ابن تريزَة ونَعيمَة
أنا البَاشَا وأنا الهَلفوتْ
سَاعَات باصرُخ عَشَان قيمَة
وسَاعات باسكُت عَلَى المَسكوتْ
-5-
أنا المصرى ..
أنا العَامِل وأنا الفَلاَّح
وأنا الزَّارِع لأرض الغِيرْ
أنا المَطحونْ وأنا المِرتَاحْ
وأنَا المَمنوعْ مِن التَّغييرْ
أنا الزَّنقَة فِ وِسط بَرَاحْ
وأنا زَيى الغَلاَبَة كتيرْ
-6-
أنا المَصرى ..
أنا المِيرى وأنَا جنابُه
أنا الإقطَاع وأنَا الطُّغيَانْ
ولَو غِيرى الطَّمع صَابُه
مِن الأنطَاع أو الشُّجعَانْ
رَاح افتَح للنَّهَار بَابُه
وأغرَّق ليلى بالأحزَانْ

-7-
أنا المَصرى ..
أنا حِطّين وأنا النَّكسَة
وأنا طَابَا وحدود شَلاَتينْ
أنا سِينَا ومِش هَانسَى
أنا شُبرَا وأنا التِّبينْ
أنا المِينَا وبَاب خَمسَة
أنا ابن القَاهِرَة تَلاتينْ
-8-
أنا المصرى ..
أنا النَّصرَانى والمُسلِمْ
أنا الخُوجَة وأنا الكَوَافيرْ
أنا الموجوع وأنا المُؤلِم
أنا الموقوف فِ خط السير
أنا القَاضِى وأنا المُجرِمْ
أنا التَّخريبْ وأنا التَّعميرْ
-9-
أنا المَصرى ..
أنا الشُّهَدَا أنا يَنَايرْ
أنا سَلَفى أنا إخوَانْ
أنا اللِّيبرالى والثَّايرْ
كِتِير أوقَات بَكون غَلطَانْ
سَاعَات فَاهِم سَاعَات حَايرْ
لكنِّى أكيد مَانيشْ خَوَّانْ

-10-
أنا المَصرى ..
أنا الشَّفَاف وأنَا العَتمَة
أنا الواثِق أنَا المِحتَاطْ
أنا اللَّى بَخاف مِن الزَّحمَة
وأنا النَّشَّال وأنا المُلقَاطْ
أنا اللِّى مَاشُفتِش اللَّحمَة
عشان الفَصلْ فِ السَّلََطَاتْ
-11-
أنا المَصرى ..
أنا اللِّى ليلاَتى عَ القَهوَة
وعَ الفيسبوكْ واليوتيوبْ
أنا اللِّى بَاعونِى عَلى سَهَوة
أنا المَكروه وأنَا المَحبوبْ
أنا الفِرعون عَشَان شَهوَة
وأنا الصِّديقْ وأنا أيّوبْ
-12-
أنا المَصرى ..
أنا المَشهور وأنا المَثبوت
وأنا اللِّى فْ بَلَدى سَاقِط قِيدْ
أنا البُركَان وأنا المَكبوتْ
وأنا المِستَنّى عُمر جديدْ
أنا العُمر إللّى فجأة يفوتْ
أنا الفَرق إللِّى فِ التَّوقيتْ