السيد عبد الكريم أحمد يكتب: العيش خلتوه تلاتة

العيش خلتوه تلاتة
ده علشان أقتاته
ولا أحلف عليه بالتلاتة
ولا فرضتوه علينا غتاتة
وأنا منى غتاتة حأكله حتاتة
لغاية أخر فُتاتة
ياريت تشدوا حيلكم معانا
وتحسنوا شكله وصفاته
خالى من زلطاته وحصواته
واللى يأكلنا رغيف نظيف
فى لقماته وكسراته
ندعيله تكتر حسناته
والعيش لو الراجل قصر فيه
علشانه تطلق منه مراته
القمح زرعه غالى
مروى من نيله وفراته
وإن كان عوده نحيل
سنابله دهب فيها حباته
الفلاح القديم كان عليه الطحين
وفى المنزل الخبيز على ستاته
والمؤمن بيدعى بالعيش الكريم
أثناء صيامه وصلاته
علشانه قامت حروب
والمُستعمر جهز غُزاته
أباد حضارات وشعوب
بلهيب نار كُراته
القوى ياكل الضعيف
عليه فارد عضلاته
وفى طوابيره ناس راحت فطيس
وإمبارح راجل دفنا رُفاته
كان جدع شهم وأمير
فى الجرايد نشرنا نُعاته
ياريت توفرونا العيش الكريم
دة حق مش طلبينه منكم شحاتة