يوم الثورة قلت حشارك.. مبقاش فارق
أم أموت إما أعيش والرأس مرفوع
ولقيتنى بهتف وبلالى
صوتى كان عالى ..كان مسموع
ضد الظلم وضد الجوع .. طبعا حقى وشىء مشروع
مش ممنوع
طالع سلمى .. ماسك علمى
فى سبيل حلمى.. حضحى بدمى
لسه بهاتى ضربوا اخواتى ..قلت الاتى :
خاين اللى بيضرب طلقة فى صدر أخوه
خاين يمكن طلقة تيجى فى ابنه فى أخته فى أمه
ويمكن أبوه
عليت صوتى .. امروا بموتى
لسة حنادى وأقول يا بلادى
عايز حقى وحق اولادى
جاتلى رصاصة .. بايد قناصة
جسمى اتنمل .. قلت حكمل
قبل ما اكمل جتلى التانية
هب فى ثانية ..رحت فى دنيا غير الدنيا
شفت مناظر ملهاش زى ..شفت الفرحة فى بكرة الجى
شفت سمانا تمطر ضى
شفت كتير و كتير و كتير
شفت المشهد فى التحرير .. شفت شباب حلفين تغيير
شفت الحب وشفت الخير .. شفت الناس عايشيين بضمير
شفت الحق ومفيش فرق .. غفير و وزير
شفت نزاهة .. شفت نزاهة و حرية تعبير
وخلاص تانى مفيش تزوير
شفت عدالة .. وناس شغالة
شفت الهندسة فى التعمير
شفت ولادنا فى قلب بلادنا
حققوا حلمنا بالتطوير
شفت حاجات .. وحاجات .. وحاجات
شفت جراءة فى قلب بنات
شفت ولاد وقفين بثبات
شفت حقوقنا ورجعت لينا
إحنا الشعب ومين يعادينا
عهد الظلم خلاص عدينا
وادى أحلامنا اهى فى ايدينا
شفت حضارة .. شفت ايدين مليانة مهارة
شفت بلادنا الغالية علينا
لكل شعوب الارض منارة
شفت سياحة ..شفت الناس عايشيين مرتاحة
شفت رقى وفن جميل .. علوا رايتنا جيل ورا جيل
شفت لباز .. وشفت زويل
قالوا حيشقوا الصحرى بنيل
قالوا حيقصروا وقت الليل
و يخللنا نهارنا طويل
شفت زراعة وشفت صناعة
وعقول بدرها بكل براعة
شفت رياضة و شفت الكورة
خلوا بلادنا فى اجمل صورة
هو ده أملى .. اللى عشانة انسال دمى
اوعى يا مصرى ترخص ثمنى
هو ده طارى و مفيش غيرة يبرد نارى
هو ده طارى وطار كل شهيد
سايبين بكرة فى ايدكم امانة بعهد جديد
عايزين مصر الغالية بلبس العيد
هو ده بس اللى حيرضينى
حتى فى موتى حبقى سعيد
صورة ارشيفية
مشاركة
اضف تعليقاً واقرأ تعليقات القراء
مشاركة
