فيسبوك
واتساب
أنا المصلوب على بابك
أنا إللى حياته فى ترابك
وزيى كتير من أحبابك
بتبعـديـهم عنك ليه
أنا المفروم فى قطوراتك
ومدفون تحت عماراتك
وانا اللى وقت أزماتك
الوحيد اللى تناديه
أنا المضروب بخرطوشك
انا الى شالونى فى نعوشك
يسيل دمى فدا رموشك
ولا حتى بتسألى فيه
أنا المخنوق قنابل غاز
أنا عايش .. بقولها مجاز
وكونى ما أموتش بقى إنجاز
ولومُت هيحصل إيه
أنا اللى عشت زمان مسحول
وأنا اللى بقيت دلوقتى فلول
فى كل عهد أنا المقتول
وانا اللى قلبى بتبكى عينيه
لا أنا سلفى ولا إخوان
ولا ليبرالى وبنى علمان
أنا المصرى .. يدوب إنسان
بيحلم بلده ترجع ليه
علم مصر
