رامى زين يكتب: ارحل يا ريس

ارحل يا ريس أمانة عليك
وخد وأنت ماشى جماعتك ف إيديك
وقنديل والبلتاجى والعريان والكتاتنى
وبديع المرشد اللى بيملى عليك
ارحل يا ريس أداءك بطىء
على قلبك مراوح ومصر قايدة حريق
ارحل ياريس لحد كده كويس
ماعدتش قادر حكمك أطيق
ارحل ياريس ضحكت عليّا
ووعدتنى بنهضة معاك جاية
ولا شوفت منك نهضة وأدى حالى النهارده
قاعد بمصمص ف صوابع إيديا
ارحل يا ريس مالكش كلمة
ضحكت عليّا ولبستنى العمة
انتخبتك لأجل تحكم لوحدك
جبت جماعتك وحكمتوا لمه
ارحل يا ريس ما تقوليش شرعة
قولى فادتنى بإيه الكلمة ديّا
غير إنك ماسك فيها علشان بعد 4 سنين
تكتب رئيس سابق فى سيرتك الذاتية
ارحل يا ريس أمانة عليك
أبوس راسك يا سيدى وكمان إيديك
ارحل الشويه إللى قضيتهم ف القصر
كفاية قوى على مصر وعليّا وعليك.