منتصر سلطان يكتب: آخر نقطة حب

آخر نقطة حب
ف قزازة قلبى المكسور
بتحاول تسحب من جواك
ترتيلك للأشواق
بتحاول تسحب ضيك
من جواك..
وترشك
على سطح همومها.
تتلون بيك.
وتردد ف الوحدة غناك
آخر نقطة حب.
هربانة.. منك ليك
يعلى أذان الفجر الغايب.
يفتح شبابيك
ف نفوس ضعفانة.
تايهة..
تتشعلق ف كمامك..
تبكيلك.. تشكيك
منك ليك
آخر نقطة حب
ف قعر النيل
بتقب ف عين الجاى
ع الشط بتصطاد
بقايا فرحة بلالينها
بتشم ف ريحة الناس..
وقت وقوع المنطاد
كان الغيط نعسان..
وحتشبسوت.. قاعدة بتتعطر
مستنية صلاح الدين
ياجى ف بهو عيونها.. يأم الفرسان
الهاربين من برد بلادهم..
لحنانك
آخر نقطة حب.
ف قزازة قلبى المكسور
كانت بتسبح
بتمجد
ف شوارع الضى الهربانة..
ف نفوس ضعفانة
تايهة
تتشعلق ف كمام السيد..
ف ميدان الحجاج
بتفسر.
سر المعبد
لعيون الضى النابت منها.
على ناصية "كليو باترا"
من ناحية رمسيس
ف الكرنك
أخر نقطة حب.
ف قعر القلب
جفت..
من نار المنطاد