يا مجنونة وفاردة ع الشطوط سحرك
فاكرة الدنيا راح تمشى حسب أمرك
زارعة النيل فى شريانى مهو نهرك
وبدرة القمح فى سنينى دهب أرضك
***
وبتقاومى وبتقاوحى
وشايلة الرمح فى إيدك
تجاعيدك ملت وشى
وفوق رمشى تناهيدك
وسارقة العمر من روحى
وماسكة القلب فى إيدك
وبدعيلك صلاة فجرى
ف ضهرى وعصرى بدعيلك
وهخطف م الزمان شمسك
تنوَّر تانى قناديلك
ولادك فرحة الدنيا
يشيلوا الظلم عن جيدك
ويسقوا بالدما أرضك
هتطرح كل عناقيدك
وسبتى عيونك السمرة
لشعر أبيض ما هيفيدك
لابد نصلَّح الغلطة
شباب الثورة دول إيدك
شباب الثورة أولادك
يجيبوا المهر فين إيدك
وسيبك من شيوخ باردة
خلاص ولُّوا مناكيدك
ومدِّى الراية لولادك
يا مصر يا أمى دول عيدك
صورة أرشيفيه
مشاركة
اضف تعليقاً واقرأ تعليقات القراء
مشاركة
