أحمد عبد الغنى يكتب: رسالة إلى السادة أصحاب المناصب

اللى باعوا نفسهم واشتروا بتمنها المناصب
واللى نسيوا أن ربهم شايف وبيحاسب..
وأنه على رد الظلم دا قادر وهيرد ويعاقب..
إحنا مش هنلوم عليهم ولا حتى هنعاتب..
ياريت يرجعوا لأصلهم لو يعرفوا الواجب..
مستنى إيه منهم.. باعوا ضميرهم بالسالب
ياريت ياللى فرحتوا بالمناصب والمواكب
والكراسى والعنجهة والعربيات والمكاتب
أن الدنيا صغيرة وعمرك ما هتفضل راكب
ولو دامت لغيرك مكنتش زمانك كاتب
على باب مكتبك أى رتبة من الرواتب
وأفتكر لما كان بس حلمك تبقى نائب
وبكيت ولفيت وقعدت على المصاطب
تحكى مع الغلابة عن حلمهم اللى شايب
ولما مسكت منصب طلعت من الثعالب
أفتكر عمرك ما هاتظلم وتبقى غالب
والظلم أخرته نار وعذاب ومصايب
والمظلوم ربه عمره ما كان للحق سايب
وفى يوم القيامة مفيش وسايط ولا حبايب
كله بيتساوى والفرق بينا هيبقى دايب
ولو طمعانين فى الدنيا من كل جانب
خدوها.. بس أخرتكم هتبقى عجب العجايب..!!