لموا التعابين اللى هجت م الشقوق
وماتهتكوش عرض الطريق تانى..
وماتفرحوش بخضة المخاليق
صحيح مافيش ظابط يعملها محضر
لكن كمان مش بعيد..
نلاقى روح "مينا"
نازلة تشقر ع الصحاب مرة
فتتعتر جناحاتها ف آذاكم..
وتعاود الكرة
لحظتها مين يضمن. .
إن الملايكة مايفردوش البساط. .
م الأرض للسموات
ونشوف "عماد عفت"
راجعلكم بيصحح الأوضاع
ويرد حقه اللى ضاع
ويصلى لله ركعتين "حاضر" ف مجلس الوزرا
ويرش بسمة روحه على وش الوجود
وبعدها يرجع..
على جنته ف هدوء
آدينى تانى اهوه باقولهالكم. .
لموا التعابين اللى هجت م الشقوق!
