سامح لطف الله يكتب: أنا وبلادى بنحبك

حبيبى الورد فى خدك
وفى الدنيا مفيش أدك
وقلبى ليك ما حد معاك
وساكن فيه كده لوحدك
***
شربت الحلو من مرَّك
ونفسى الدنيادى تسرَّك
وبدعيلك وقلبى معاك
غرور الدنيا مايغرَّك
***
بحب النظرة من عينك
تغيب عنى أقول فينك؟
توِد القلب يصفالك
تطير الروح بينى وبينك
***
يقولوا عليك خلاص باعني
غرام الدنيا ما يساعني
ولا يساوى نيران حبي
لِليلة معاك هتجمعني
***
بحبك يا حبيب روحي
يا بلْسم قلبى وجروحى
وفين هتروح وفين تيجي
هتمسح دمعتى ونوحي
***
بحبك لما نتواصل
وفى ميدانا بنتواصل
ونهتف عيش وحرية
ولابينا خلاص فاصل
***
بحبك ثورة فى دمي
ببركانك يزول همِّي
ولما يغضبك دلعي
ولمَّا تقولِّى إتلمِّي
***
بحبك لمَّا بتقيَّر
ودم الوش يتغير
تحاسبنى على غلطة
بنظرة ولفته بتحيَّر
***
وحب بلادى على قلبك
بيرفع فى القلوب سهمك
بحبك إنت يا أملي
أنا وبلادى بنحبك