محمد زكريا حبيشى يكتب: مصرى مطحون

ما عدّتشى ولا مرة
بيبان الحلم للآخر
يدوب أمشيلى كام خطوة
وعنى الكل يتأخر
ولا حاجه وصلتلها
طموح بيضيع من الآخر
رياح الحسرة مسكانى
تدمرلى اللى بَسّعى لـُه
سيوف الوهم قتلانى
ولا حد انشغل بالـُه
ولا جه مرة يرعانى
ولا ادانى ف يوم مالـُه

وغيم إسود ملازمنى
معكر صفو أشواقى
وضحكة فيا تألمنى
تلخبط فيا أوراقى
تتوهنى بحور ظنى
ومالقاش فرّح يوم باقى

طريق اليأس غطاني
وليل الهم عرفـّنى
بإن الحيره عنوانى
ولا فيه شىء بينصفنى
ومليون خطوه وخدانى
لدوامه بتعرفنى

ومادد للزمان إيدى
تشاور للنجوم روحى
ويسكن قلبى تنهيدى
وليه يا ضحكه بتروحى
وليه يا دُنيا بتحيدى
ولا بتهتمى بجروحى

قلوب مهمومة بعيوبى
وغايتها تجيب سيرتى
وامتى يا غيره هتوبى
ويحتاروا بنار حيرتى
وألاقى بكرة محبوبى
يبات جوايا وف صورتى

إلهى وحدك العالم
محطات الأمل فيا
ومظلوم كنت مش ظالم
ولا المال كان ف يوم غيه
بأمرك بس أكون سالم
بروح طاهرة ومهديّه