فوق يا سيدى الحياة كلها شقوق
فوق يا سيدى البلد بقة سوق
فيه كل الأصناف والألوان
حرامى وتاجر وراجل غلبان
والكل بينهش فيه زى الحيوان
فوق يا سيدى فوق
سرقة نصب قتل سحل ضرب
وأنت فى ملكوت غير الملكوت
فوق يا سيدى فوق
الشاب شاب والدم فاض
والضمير غاب والبلد بقة خراب
وأنت عايش فوق السحاب
فوق يا سيدى فوق
قولى مين أكون
قولى أشكى لمين الهموم
قولى أشكى همى ولا أسلم للجنون
قولى الموت ولا الحياة فى بحور الدم والمجون
قولى أضحى بالفاضل من دمى فى العروق
قولى ممكن يكون بعد الشروق شروق
فوق يا سيدى فوق
مين غيرك يحمى كرامتى
مين غيرك يلملم هزيمتى
مين غيرك يحقق مطالبى
فوق ياسيدى فوق
صرخنا بأعلى صوت
قولنا خلاص مات السكوت
ودفنا بأيدينا ملامح الجبروت
وأتارينا بننتقل من موت لموت
وأتارى الحياة مطلب مشروط
فوق يا سيدى فوق
مش عاوزين كراسى ولا مناصب
مش عاوزين صراعات دمنا ليها ضرائب
عاوزين حماية من كل غاصب
عاوزين حياة مجرد حياة من غير مصاعب
فوق يا سيدى فوق
قالوا إنك هتكون الفاروق
قالوا بعد العتمة يكون الشروق
وأتارينا لبسنا أكبر.. خاززوووق
يلعن أبو الفرقة ويلعن أبو الصندوق
فوق يا سيدى فوق
صورة أرشيفية
مشاركة
اضف تعليقاً واقرأ تعليقات القراء
مشاركة
