هشام فتحى يكتب: بلملم فيك وطن تايه

بلملم فيك
فاضل حتة
كمان ع السكة كام جثة
وعند القصر يا وطنى
سهام وسيوف وكام طلقة
وكام مولود بيتكفن وكام طفلة
فاضل يا عين حوالى النيل
كتير لمة
جنازة وسوق وكام زفة
وحاجة لسة فى اللفة
ما بين الخُطّ نخنوخك
وبين (شطة) وبين (كمبة)
بلملم فيك
وطن ننساه ونفتكروا
نقطع فيه ومش دارى
ما بين القصر والمترو
فاضل دقة
وحلم هناك واقف حاير
عايز فوقَه وكام زقة
بلملم فيك وطن تايه
ما بين شوطين لعب كورة
وراح فى الزحمة يتعاتب
ويكتب كلمة من سطرين
لا يعرف أصل ولا صورة
وطن يا عين بيترقص
على الكورنيش
وناس فى بيوته منحورة
بلملم فيك على صدرى
وأضمك تانى فى الصورة
أتارى وأنت مش عارف
بتحرق قلبى بالدوسة
وأقول بوسة!!!
يا محروسة
وياخد الموت
ولادى تحت مقطورة
بلملم فيك على حدودك
زنادى قال ورا مني
وجودى رهن بوجودك
وقفت سنين على بابك
قتلنى الصبر وإيه يعنى
ما أنا مصلوب على وعودك
بلملم فيك
وطن يا ناس بيتبهدل
ويوم ورا يوم
بقاله كتير بيتبدلْ
وطن بيعيش على الصندوق
بكام سلفة
ولقمة عيش
فقعر السلة والقفة
بإيد طفلة
وهوّ سنين كان الأولْ
وطن عمّال بيتغيّر
يمين وشمال
من المجاريح بيتّميّلْ
بلملم فيك
تكون فى الدنيا دى الأول
بلملم فيك
ومهما يكون لازم ترجع
تلم ولادك التايهين
يهون الصبر يوم ترجع
ترد الهيبة للميادين
تغنى كتير وأنا بسمع
بلاش الغيبة يا غالى
دى غيبتك يا وطن توجع
بلملم فيك
ما بين الحلم والمخدع
عشان خاطرى
عشان خاطرك
لازم ترجع