فيسبوك
واتساب
بساط من دم متنتور
مابين شرفك وبين كرسيك
ودعوة قهر من مظلوم
وطالعة للقـوي ف عُلاه
وعين كانت سبيل بكرة اللى متأخر ..
على الأطفال
مالحقتشى تشوف الفرحه حضناهم
وسابت أمرهم لله
وشاب جميل ف عمر الورد
وصل ف ميعادة للسموات وفردوسها
ودمعة يتم مذهولة ..
ومستنية رجعة أب
عشان يلاعبها ويبوسها
وعَبرة قهر ف عيون اللى خاف يصرخ
وكدّب ع الشاشات صورته
وبرىء زور ايدين فاجر ..
كريه الهيئة والسحنة
عاث ف العرض بفساده ..
وزود قسوة المحنة
وهان قدسية المعنى
هنيالك ..
هنيالك طريق مفروش بميت لعنة
مسير قُطاعه يتكاترو على عرضك
وبين ايدهم تشوف ابنك ..
وحيد عريان على الأسفلت
ويصرخ مايلاقيش غير غل م الحراس
وعاهة ذل على بدنه ..
شايلها م القدم للراس
تعيش عمرك أسير خزيك
ولاتلاقى قلوب تدمع ..
ولا شفقة عيون تواسيك
مافيش غير بس ..
خطوة قدمك المشؤوم
على بساط دم متنتور ..
مابين شرفك وبين كرسيك .
أشرف الشافعى
