أحمد عبد الغنى يكتب: الريادة المصرية..!!

الحمد لله أخيرا لاقينا مصر متقدمة ومتفوقة على دول العالم فى حاجة وفى مجال من المجالات، فمصر ولله الحمد فى المركز الأول عالميا فى الأصابة بأمراض الكبد وخصوصا فيروس (سى) تكبير بقى يا شعب.. ومصر برضة ولله الحمد فى المركز الثامن من حيث الإصابة بمرض السكر.. الله أكبر تكبير وتهليل بقى يا شعب.. (واضح أن من كتر ما دم الشعب المصرى خفيف ومسكر فالكبد عندنا ما استحملش فسبق العالم كله فى أمراض الكبد والسكر..!!).

والحمد لله أن إحنا وصلنا للمراكز المتقدمة دى واللى أعتقد أن النظم الحاكمة كلها فى مصر كانت بتحاول وتجاهد عشان تنافس العالم وتحتل مراكز متقدمة فى إى حاجة، وأخيرا تحقق الحلم فى الأمراض.. ولا حول ولا قوة الإ بالله، وأعتقد كدا أن إى نظام حاكم فى البلد دى مش هيحاول يغير الوضع دا لأننا مش هنقدر نحتل إى مراكز متقدمة فى إى حاجة لا فى علم ولا فى رياضة ولا فى سياسة ولا فى الدموع..!!

دا بخلاف برضة إن إحنا متقدمين جدا فى نسب التلوث عالميا، والقاهرة من أكثر المدن تلوثا على مستوى العالم، وبتنافس بقوة والحمد لله على الريادة فى التلوث.. تكبير يا رجالة..!!

إيه الحلاوة دى يا بلد.. مراكز متقدمة فى الأمراض والتلوث.. بس.. هى دى بلد الحضارة ومصر أم الدنيا واللى علمت الناس والكلام الكبير بتاع التاريخ والجغرافيا دا..

بح خلاص مبقاش فاضل غير كدا.. حتى لما كان عندنا علماء ليهم الريادة عالميا مكنش حد بيعرف عنهم حاجة ولا الحكومة حتى بتستعين بيهم.. فين فاروق الباز؟؟

فين مجدى يعقوب (المركز الطبى بتاعة فى أسوان محتاس لقلة التبرعات؟؟).
فين أحمد زويل بتاع نوبل (مشروعه مليان بالمشاكل والمعوقات؟؟)
فين كرم جابر البطل الأولمبى اللى عرضوا عليه جنسيات مختلفة عشان يلعب باسم الدول الأخرى؟؟
فين علاء أبو القاسم البطل الأولمبى الآخر؟؟
فين أبطال الإسكواش أبطال العالم؟؟
فين فريق كرة القدم للصم الحائز على المركز الثانى عالميا؟؟
فين فريق عازفى وعازفات الوفاء والأمل الذين أبهروا العالم؟؟
فين شيوخ القراءن الكريم الذين علموا العالم التلاوة؟؟
فين الدعم للرياضة وللطب وللعلم وللفنون ياسادة؟؟
فين يا حكومة الاهتمام بالمواهب والعناية بالخبرات الموجودة؟؟
دا مصر حتى بلد ولادة وليها فى كل مكان الريادة..!!