كانت بعيدة
زى عصفورة فى السما
كانت قريبة
زى صورة فى محفظتى
كان من الطبيعى
أنى أسأل نفسى
يا ترى
القاهرة
فيها شوارع كفاية
نمشى فيها
لحد
ما نتوه من بعض
يا ترى
القاهرة
فيها شوارع كفاية
نهتف فيها
لحد
ما نلاقى الحرية
يا ترى
مسموح للعساكر
يدوسوا على صدورنا
بأنفاسهم التقيلة
ويلعبوا
فى ضمايرنا
بصوابعهم المكهرية
لغاية ما نكفر
بأى حضن دافى
بعد سفر طويل
لغاية ما نقبل
بأى ركن ضلمة
بين الموت والحياة
عارفة
انتى الموت والحياة
انتى المعرفة والحرية
وانا ح افضل كده
ازق فى الصخرة
لغاية م اوصل
لقمة الجبل
لو حتى ح اقع
ألف مرة
مش مهم
المهم
أنى أول م اوصل
لفوق
حرسملك جرافيتى
بعدين ابص للسما
وأصرخ فيها بعزم صوتى
" مكملين "
