د. هانى أبوالفتوح يكتب: مخطوفة ليه تانى ؟ !

اشتقت لك موووت ..
اشتقت لهدوئك
تثورى ما تثورى ..
تتفكى عن طوقك
تتغطى بالدخان ..
تملى السما ألوان
مخنوقة فى شروقك
……………
اشتقت لرجوعك ..
وأكره أوى خضوعك
أكره ساعات الظلم ..
ولو متنا من جوعك
الحزن يملا الصوت .
عشق الشباب الموت
والصرخة فى ضلوعك
……………
شايفك فى ليل الحزانى
و سكة المجهول
مين اللى فيكى اشترانا
و خلا ليلنا يطول
مين اللى دخل عِدانا
اللى سبوا صحب رسول
مين اللى غير حياتنا
عشان يعيش مسؤول
قال إيه بقالك حبيب ؟
و أنا اللى بس عزول !!!
………………
مين اللى عشق الزعامة
وشاف فى نفسه زعيم
وبص لينا بهايم
نعشق البرسيم
نموت قباله و يشخط
بصباع فى عينا غشيم
فاكرنا حبة عبيد
و محتاجين تقويم
…………
ملعون أبوكى لو ..
ما رجعتليش تاني
أنا اللى شارب المر
و متكسرة سناني
و أنا اللى جواك حر ..
و هو جِهْ أناني
خطفك فى ليل الحزن
و بدلوه مكانى