قرار جمهورى

قرر الرئيس المبجل والقائد المفدى زعيم الأمة وحامى حمى الوطن عدة قرارت هامة ستفرح الشعب، وتنهى كل المشاكل وتريح كل التعبانين، وتدخل كل الأبراص والصراصير جوا الجحور وأول هذه القرارات:

أولا - إقالة الحكومة الحالية نظرا لعجزها الدائم فى إدارة البلاد منذ 6 أشهر بحالهم، واستهتارها بمقدرات الشعب، وتحويل الأرصدة البنكية للخارج، ونهب المليارات من الدولارات من مشاريع التنمية، واختفاء الزيت والسكر والعيش والجاز والبنزين وتحويلهم لدولة صديقة وترك الشعب جعان، واعتمادها ميزانية الدولة فى إقامة مشاريع غير ترفيهية للشعب المضايق والزعلان واللى عاوز حد يفرفشه وينعنشه ويدلعه.

ثانيا- يشكل الحكومة الجديدة كل من.. السيد الزعيم الشعبى الثائرالمحبوب صورة الزعيم القومى الراحل إلى طالع بمادة فى الامتحان الأخرانى، والسيد الوزير المفوه وأمين الأمة المحبوب من الشعب، والمكروه من إسرائيل وإلى شايل مادة هوا راخر فى الامتحان الأخرانى، والسيد الواجهة الكبيرة مشرف بلدنا ومشهيصنا بين الأمم وأمين الطاقات النووية وموفر لنا أفكار الحرية إللى اتحرمنا منها طول عمرنا وإللى خاف يخش الامتحان الأخرانى فقرر يهده ويعمل امتحان من جديد على كيفه، وشمل القرار السيد زعيم بيت الأمة صاحب الهوا والأرض والسما، كما لم ينس الرئيس السيد النقيب والمدافع عن الحقوق القومية والشعبية من كل ولاد الحرامية وسراقين العيش والطعمية.

- بند على جنب.. بيقولكم الرئيس المفدى افرحوا يلا يأولاد وزقططوا واعملوا تقسيمة مشتركة ومتوالفة للفريق الحكومى منكم، وعلى كيف كيف كيفكم وهاتوا كل اللى عاوزينه المهم يكون عنوانكم إنقاذ مصر تنقذوها ولا تغرقوها مش مهم، المهم هو تحقيق حلمكم لأنى أبدا مقدرش على زعلكم، ومش مهم الشعب، المهم هو إنكم تتسلوا وأوعوا تكونوا متضايقين ولا زعلانين.

ثالثا- قرر السيد الرئيس تشكيل لجنة جديدة لصناعة مواد دستور جديد، بدلا من ذلك الدستور المهترىء غير المتوافق عليه، والذى رفضه الشعب ورفض ما فيه من مواد هتخرب البلد وترجعها لورا، وفرضه علينا ولاد الذينا بتوع العمم والدقون، على أن يتم تشكيل اللجنة من السادة الأفاضل المناضلين والثوريين والمكافحين والنشطاء والقياديين، وبتوع البيت الأحمر بتاع زمان، وبتوع البيت الأبيض إللى لسا موجود لحد دلوقتى.

وبيقولكم الرئيس واحيات النبى مش عاوزين ننسى حد من الهتيفة والمسقفاتية والهبيشة والكبيشة والنحيتة والحفيفة وبتوع النظام اللى فات وإللى قبله وإللى قبله علشان ميزعلوش وميغضبوش ويعطلوا لنا المسيرة، ووالنبى علشان خاطرى إن كان ليا عندكم خاطر متنسوش بتوع التحرش فى الميادين ودعاة المدنية والحرية والتقلية، وكمان والنبى متنسوش البت إللى بتقلع برا شفوها عاوزة إيه، هى والجماعة إللى عاوزين يتجوزوا بعضهم، إمال محنا لازم نحل مشاكل الشباب ونعرف هما بيفكروا إلزاى، وكفايا رجعية وتخلف فى التفكير محنا لازم نتقدم زى برة، دا أنا سمعت إن بريطانيا رخرة اتقدمت وسمحت للشباب الرايق بالجواز، وإحنا لازم نبقى زيهم، ويا نعيش زيهم يا نموت قبلهم.

وبأرجوكم يا ولادى إوعوا تزعلوا حد والنبى دا أنا من إيدكم دى لإيدكم دى، وطلباتكم عالراس والعين، دا اللى نعرفه أحس من اللى ما يتسموش بتوع الجلبية والعمة والشال، وأتمنى ألا تخرج اللجنة عن مسارها فى عمل دستور يرضاه شعب الجمهورية الديمقراطية علشان تبقى عيشتنا لوز وجوز هند ومهلبية وصباحكم قشطة.

رابعا - كما قرر سيادته إعادة المستشار الدكتور لمنصبه، وإلغاء جميع قرارات المستشار من غير دكتور، إلا إذا لحق نفسه وخد الدكترة، وأصبح زى إللى قبله راجل سكرة، وغلق جميع الملفات المشفرة التى فتحها من جديد، وقدم الاعتذار الكافى والوافى والشافى لكل السادة إلى زعلوا من سيادته وشتموا عليه وسبوه، ويقولهم أنا آسف وهابوس على إيدكم وراسكم ومش هعمل كده.

خامسا - قرر سيادته حل مجلس الشورى السلفى الإخوانى، وإلغاء انتخابات مجلس النواب المقبلة التى من المتوقع إنها تجيب لنا سلفيين تانى وإخوان من جديد، ويطلع لنا إللى عاوز يحجب البنات ويقفل القنوات، ويغلوش على المزز إللى فى النت، ويخرب بيت بتوع المزاج واللذة، ويقول للشعب قوم صلى الفجر، وروح الشغل، هوا إحنا هنصلى ولا نام، إحنا تعبانين طول الليل قدام القنوات، وأما نبقا نصحا نبقى نشوف الشغل، وبعدين الشغل ده دور الحكومة مش دور الشعب، أمال إحنا عاملين الحكومة ليه.

- حتة على جنب.. بيقولكم السيد الرئيس نصبر شوية لحد ما الولاد الثوريين والمناضلين وبتوع القنوات الفضائية والهتيفة فى الميادين يشدوا حيلهم شوية، ويقدروا ينافسوا الإخوان فى مجايب الزيت والسكر للشعب علشان يدخلوا البرلمان ويقولوا "شى.. حا.. ناجحين إن شاء الله..عملنا إلى علينا.. والباقى على الله".

سادسا - اتخذ الرئيس قرارا خطيرا ومهما ومطلبا تؤكد عليه المعارضة كل يوم، وهو تحويل جميع ضباط وأفراد وعساكر ومجندين الداخلية للمحاكمة العاجلة، وتحويل كل من وقف من الشرطة ورجال الأمن أمام قسم يحميه أو وزارة يدافع عنها أو قصر للرئاسة إلى النائب العام، لاتخاذ القرار المناسب ضدهم لتعطيلهم إنجازات الثورة وهدمهم لأفكار الثوار ووقوفهم أمام دعوات النضال الثورى الرجالى الأنثوى الوحدوى المشترك.

- بند جديد وجيد على جنب.. أمر سيادته بتكريم كل مزقلاتية الطوب، ومن قبلهم مكسراتية البلاط والحوائط الرخامية، من أجل خدمة تزقيل الطوب، كما يكرم سيادته حديفة الملتوف، وجلابين الأزايز بتاعة الملتوف، وشكر خاص لصنايعية الملتوف، وكل من صرف قرش لوجه الثورة وخدمة الثوار على الملتوف، وحدفه على العساكر الصهاينة بتوع الاحتلال الإخوانى السلفى فى كل ربوع القطر، وليسقط الاحتلال.

- آخر بند على جنب.. ولم ينس الرئيس فى حفلات التكرم المقرر إقامتها مشعللاتية الحرايق فى قصر الاتحادية ومدرسة الليسيه والمجمع العلمى ووزارة التموين وهيئة النقل وفندق سيمراميس ومقرات ومبانى المحافظات ومجمعات المحاكم والأقسام بكل من السويس وبورسعيد والإسماعيلية والشرقية والمحلة وطنطا ودمنهور والإسكندرية والمجاهدين فى محيط التحرير والاتحادية ومحمد محمود والقصر العينى وكوبرى قصر النيل و6 أكتوبر، وبيقولكم وبمنطق أرسطو "إذا كان الرئيس يريد إسقاط الشعب، والثوار يريدون اسقاط الرئيس، إذا الثوار كدة بيحبوا الشعب".

- بند منى أنا ومش على جنب.. سوف أقول لسيادة الرئيس يأخذ شوية أنواط شرف وواجب ونياشين وقلادات "كلها فالصوا"، من خزانة القصر الرئاسى، وبصراحة هما إللى فاضلين فى القصر بعد هبش النظام السابق كنا محافظين عليهم نشترى بيهم درة مشوى زى فيلم الأيدى الناعمة، ولكنهم مش خسارة فى كل من قام بقطع الطرق وغلق المزلقانات وسرقة السيارات والسطو على المواطنين فى عز الظهر.

ويسألكم الرئيس بينى وبينكم هل بكدة ترتاح المعارضة ويهدأ مدعى الثورة وتقر عين الفلول ويشم البلطجية حيلهم من غير ما حد يضايقهم ولا عاوزين حاجة تانى.

وشكرا ومع السلام عليكو..