(1)
شـِدّوا الستايرْ، كعب دايرْْْ،
وْخيوطها من ليف الضلامْ،
والنــصْبة كانت مش كما الواجب،
ولا قدّ المقام، وكإن مولانا ما كانشـِى: يومْ إِمامْْْ.
(2)
كان بودى ما شوْفشى إن الحارة سدْ.
كان بودى ينجحوا، لكن بجـدّ
كان بودّى أَصَدّق إنّ العْدلْ ُُمُمكنْْ.
كان بودى، كان بودى!!،.. قلت: "يمكنْ".
كان بودى إن الشباب دول ينقذونا
كان بودى إن الحرافيش يلحقونا
(3)
التعلب، فات فاتْ،
وفْ قلبُهْ: العـُـمْر آهَاتْ
والثورهْ: أولاد وبنات
قلبوهَا... شوية كلمَاتْ
ورجالهاَ: لابْسين "شِرْتات"
بيحكـُّوا ويقولوا شعارات
(4)
الشباب طايحْ وضايعْ، أيوه: "جدّا"
والجماعة دايرة بتقتـِّل وتـدّن
والتاريخ عَرْكَةْ اللِّى فاز فيها بيركَبْ.
يطلع المـنْـبَـرْ ويخطُبْ:
العيال الشغالين هُمَّا اللِّى فيُهمْ،
باسُمُهمْْ نـِـْلَعْن أبو اللِّى خلّـّفوهم
"باسْمُهُمْْ كل الحاجات تِبْقى أليسْطَا
والنسا تلبس باطِيسْـطَا
والرجال يتحجّـُبوا، عامِلْ وأُسْطَىَ".
(5)
يعنى كل الناس، عُمُومْ الشعب يَعْنِى:
لمْ لابدْ:..:
إنه يستنّى ويمكن يوم حايشبعْ.
وإن ما جاشى اليوم ده يكفيه إنه يسْمَعْ.
خطبة الريـِّس، تِحزّم بطنه أكتر بالحزام
وإن لَقَى سمَعُه يا عينىِ مِشْ تمامْْ،
يِبْقَى يسجد بعد ما يركع قوام ْْْْْْْْ
بَسّ يلزَقْ ودنه عَالأْرضِ كـِـوَيِّسْ
وإنْ سِمْعِ حاجَةْ تِزَيَّقْ، تبقى جَزْمة حَضْرِةْ الأخ اللِّى عـيّنْ نَفُسُهْ "رَيّسْ"،
لاجْلِ ما يْعَوَّض لنَاِ حرمَانْ زمَانْ،.. إمّالِ ايِهْ؟
واللِّى يشبْع مِنكُو لتّ وعجن، شُـوفْ، سمَعَانْ كلامْ،
يِقَدْر يـِنَامْ:
مُطْمَئِنْ،
أو ساعات يقدر يِفِـنْ.
واللى ما يسمعشى يبقى مُخّهُ فوِّتْ،
أو غراب على عِشُّه زَنْ.
(6)
والحاجات دى حلوة خالص بس إوعكْ تِسْتَـمَنّـى إنك تقيسها،
أَصْلَهَا خْصُوصِى، ومحـْطوطَةْ فى كيسْها.
إنت حُـرّ فْ كل حاجة، إلآ إنك تبقى حر.
يعنى كل الناس يا حبة عينى ممكن تبقى حرةْ.
حرة كما وُلدوا وأكْتَرْ،
يعنى بلبوص حر خالص، بس ما ينطقشى كلمة،
يِتخدش بيها حياءْ حامى البلاد من كل غُمّـةْ،
ما هو مولانا رأى الرأى اللى ينفعْ،
و"الجماعة" تقول، يقومْ الكل يسمعْ.
واللى عايز أمر تانى، ينتبه للأوّلانى.
مش حا تفرقْ. قول يا باسطْْْ.
كله ماشى... تبقى هاصِتْ.
(7)
الدنيا دى طول عمرها تدّى اللى يـِغـْلبْ:
سيف ومطوةْ
واللى مغلوب يـنـضرب فوق القفا فى كل خطوةْ
أصل باين إن "داروين" كان ناويلْهَا:
إن أصحاب العروشْ.
ويَّا أصحاب الفضيلةْ،
يعملولْنا جنس تانى
جنس أحسنْ
إسمُهُُ: "إنسانٌ مُحَسَّنْ
وإحنا برضه لسّة من جنس البشرْ: . .القديمْْ.
يعنى "حيوانٌ بـِيِنْـطَـقْْ"، مش كفاية؟؟
ليه بقى عايز يقلِّــِّبْ، ولاّ يفهمْ؟
هوّا إيهْ؟ !! هيَّا سايبةْ؟ !!
يِكفى إنه يقرا "دستور" السعادةْ،
واللى صعب عليه حايلقى شَرْحُهُُ فِى خُطَبِ القيادةْ.
واللى لسّة برضه مش فاهم: يُـحاكــَـم.
وانْ ثَبَتْ إنه برىء:
يتــْـَرَزْع نوطِ "العَبَطْ"
وإنْ ثَبتْْ إنه بِيِفْهَمْ:
يبقى من أَهْل اللَّبَطْ.
"يعنى إيـــه؟"
زى واحد ناسى ساعتُهْ.
يعنىِ نِـفسُهْ فِـى حاجاتٍ، مِشْ بِتَاْعتُه
"زى إيه؟"
(8)
زى واحد جه فى مخه -لا مؤاخدة- يعيش كويّسْْ.
"برضه عيب".. هوَّا يعنى ناقْصُهْْ حَاجَةْ؟ !!!
قال يا أُمّى، والنبى تدعى لنا إحنا والرئيسْ
ربنا يباركْ فى مجهودنا يكتّـَّر فى الفلوسْ.
بس لو نعرف معاهم قدّ إيه، واحنا لينا كامْ فى إيهْ!
(9)
كِدَاهـُهْ؟؟!! طبْ خُــدوهْْْ، وضّــبوهْ،
واحكُموا بالعدْل يعنى: إعْدلوهْ
تُهمتُهْ ترويج "شفافـيِّه" مُعاصْرةْ
هذا ملعوبُ الخَواجةْ
وان رمِينَا الكومِى بدرى، تبقَى بَصرةْ.
"الكلاْم دا مِشْ بتاعْنَا
دَشّ ماْ لهُوْش أى معنى"
تُهمتُهْ التانية "البجاحة"
وإحنا فى عِـزّ الصراحْة،
واللى عايز غير ما يُـنشـرْ،
هوّه حرّّ إنه "يـفكـرْ"،
فى اللى عايزُهْْ.
أو يشوفُهْ جوّا حلمـه،
وإن حكاهْْ يحكيه لأُمُّــهْ،
وإنْ أخد بالُـه وقاُلْه مُـوَطِّى حِسُّهْ،
مستحيل حدّ يِمسُّهْ.
(11)
قالّها يا مّهْ أنا شفت الليلادِى:
إنى ماشى فى المعادِى.
شفت نفسى باخترعْ نظريَّةْ موضَـهْ،
زى ساكنْ فى المقابرْ يبنى قصر ألف أُوضهْْ:
"والعواطف أصبحت مـِلْك الحكومةْ،
والحكومة حلوهْ خالص.
عبّـت الحب اللى هوّه، والحنانْ،
جوّا أكياس المطالْبةَ بالسَّلاَمْ،
والطوابير اللى كانت طولها كيلو،
اختفت، أصل الحاجات خلصت، خلاص،
و"المافيش" دا مين يشيلو
" واللِّى طَالُـُـهْ من رضا الريّس نصيبْْ:
فازْ، وقّــلعْ.
واللى لسّه ما جاشِـى دوره. بات مولع.
(11)
قلت طـَبْ وِلْحدْ إمتى؟
قال يا سيدى: إنت حتـَّة وأنا حتـَّة
قلت لأْ، دى مصر يا ابنى مش فطيرة
قال دى خـَـبزَة منيّلة من غير خميرة
قلت: لأَّه يعنى لأَّه !، بكره تتفرّج علينا
لما نعرف ربنا، نبنى بإيدينا :
دون ما نشحت من مشايخ أو خواجهْ
انت لسه شفت حاجة!!
قال: على الله
قلت: يــالله. ..
مشاركة
اضف تعليقاً واقرأ تعليقات القراء
مشاركة
