يا فاجومى يا أبو النجوم
روح شد العباية وجوم
خدنى وياك فى الحوارى والشوارع
مش مهم فى أى يوم
بس ورينى عينيها السود والنور مشقشق
فى المطر جوه الغيوم
وأبوابها اللى مفتوحة لأحبابها
رغم الأسى ورغم الهموم
عايقة وجميلة وريحتها ورد
وعطرها فى الكون يدوم
وفى حجرها عسلية لية والماورد
وحلبة خضرة وفول ودوم
ولاجل ما حبك لها كبير قوى
فوق اللزوم
دخلوك السجن يا أحمد
ألف ليلة وألف يوم
حيسجنوا إيه والنبى
الكتب ولا الهدوم
اللى يعشق مصر قد أحمد فؤاد
لو تسجنه
لو تسحله لو تدفنه
شعره فى روحه
وروحه راح تفضل تحوم
هو السمك لو تسجنه
حتعلمه يبطل يعوم؟
فؤاد نجم
مشاركة
اضف تعليقاً واقرأ تعليقات القراء
مشاركة
