أحمد عبد الغنى يكتب: الفرق بينا وبين الإخوان..!!

فى 2012 اختلفنا مع الإخوان حول الدستور ولم يحدث مننا كمعارضة لهم أى تفجيرات أو تهديدات لأمنهم وسلامتهم .. معارضة نظيفة تمارس دورها برقى وتحضر.. حتى وأن خرج بعض المعارضين وقتها عن المألوف بتحطيم بعض مكاتب حزب الحرية والعدالة أو حرق لبعض مقراته وأحيانا تعطيل لحركة المرور عن طريق البلاك بلوك .. إلا أن كل تلك المعارضة لم تصل الى القتل والتفجيرات وإزهاق أرواح الأبرياء .. وفى كل مرة كانت تحدث فيها مثل تلك التجاوزات تخرج أصوات العقلاء منا وأصوات المعارضة الحق بالشجب والأدانة لمثل تلك التصرفات الحمقاء .. حتى وأثناء فض اعتصاماتهم فى النهضة ورابعة خرجت أصوات منا ترفض تلك التصرفات وهذا الفض وتشجبه وتعارضه وترفض وتدين العنف .. الآن تغيرت الأوضاع وأصبح الإخوان وأعوانهم من الجماعات التكفيرية والجهادية فى موضع المعارضة ولكن بدأت الأمور لديهم مختلفة والمعارضة عندهم غير مألوفة بالنسبة لنا وبدأوا بالتهديد ثم الوعيد وفض اعتصام الاتحادية خير شاهد وخير دليل.

ثم بعد عزل المعزول تحول الكلام إلى بنحذرك ياسيسى وهنفجر وهننسف وهتلاقى متفجرات وعربيات مفخخة وناس بتفجر نفسها وعربيات بتتفجر بالريموت كنترول وكلام من هذا القبيل.. وتحولت التهديدات الى حقائق فى سيناء والإسماعيلية والمنصورة .. ومحاولة اغتيال وزير الداخلية واغتيال بعض ضباط الشرطة مثل محمد مبروك وغيره.. وفى الآخر بيشمتوا فى الموتى وبيفرحوا باللى حصل وبيستمروا فى ترديد أكاذيبهم بأن الداخلية هى اللى بتموت ضباطها والجيش بيقتل فى عساكره فى سيناء ورفح وأن والمسيحيين بيحرقوا فى كنايسهم والشعب بيقتل نفسه وهما بيسبحوا وبيدعوا وبيصلوا وبيجاهدوا فى سبيل الله وفى سبيل الشرعية وطلابهم بيكافحوا فى تحصيل العلم فى الجامعات المصرية وخصوصا الأزهر ولابينطوا الأسوار ولا بيحرقوا ورق الامتحانات ولابيضربوا الدكاترة ولابيكسروا أو يحرقوا فى مبانى الجامعة وبيغطوا الدكتورة اللى اتعرت علشان تتصور ولا بيحبسوا الموظفين ولا بيسلسلوا الأبواب ولا حاجة خالص .. ناس زى الملايكة .. لا دا هم ملائكة فعلا وإحنا اللى ولاد أبالسة.. ولم نر منهم أى رجل رشيد أو عاقل يشجب الإرهاب ويترحم على الموتى لم نسمع صوتا لدكتور العوا أو أبو الفتوح أو الدكتور محسوب أو الدكتور الجوادى فى أى حادث إرهابى.. فقط لم نسمع أو نرى إلا تشفى فقط لاغير ..!!

أيها المصريون .. الدم كله حرام .. اللهم لاشماتة فى من مات أو قتل أو استشهد أو أصيب غدرا وظلما ..!! ألا لعنة الله على الظالمين