د.إيهاب عبده يكتب: مصر المنصورة

إياك تفكر يا خسيس إن مصر بتنحنى
أو إن فيها حتى عيل راح يسلم
أو يخاف
دى مصر أقدم م التاريخ.. من كل أمة بتتبني
وولادها عدوا فوق الزمان
اقرأ التاريخ
هوه اللى شاف

إن سال فى يوم دمعة حزينة م العيون
اعرف إن النهاية قربت
وإنك خلاص
دى مصر دايمًا دمعها بيهز كون
لا تسيب فى يوم حقها
حتى القصاص

مات الشيوخ قبل الشباب فى منصورتها
لا يوم تهون جوه العيون
ولا راح تتاطى
اخترت اسم بينتصر من يوم ميلادها
وحاولت تزرع خستك
قطع الأيادى


دى بلاد رايتها فى السما عالى مكانها
وإحنا وراها
نفدى شموخها وعزها
حاول تنال منها أو من أسودها
واكتب نهايتك
جوه التاريخ على أرضها

ولكل خاين سمى نفسه باسم دين
راح ييجى يوم
مصر العظيمة
تنهى وجودك
وولادها اللى ولاد حلال ومؤمنين
هايمحوا كل ذكرى ليك
لو حتى صوتك


عيشى يابلدى بروح شبابك نفتديكى
لايوم تموتى
يا مصر أبدًا
ولاتتعبى
فى الظهر شعبك يسندك.. دايمًا حاميكى
عدى علينا
وامشى فى طريقك
شعبك أبى